اے وھد ءَ بلوچستان بلکیں دنیا ءِ یکیں دمگ بہ بیت کہ ادا دراھیں دمگ ءَ یک دگے ھم سرجم نہ اِنت کوئٹہ کراچی دگ بہ بیت کراچی خضدار دگ ،کوئٹہ نصیر آباد ،کوئٹہ ژوب ،لورلائی،کوئٹہ مکران ،تربت پنجگور،پنجگور گوادر یک دگے سرجم نہ اِنت کہ مردم ءَ اوپارے بروت اے وھد ءَ بلوچستان ءَ چشیں تحصیلے نیست کہ دگے یا سڑکے سرجمی ءَ جوڑ کنگ بوتگ ۔ذرداری حکومت ءِ دور ءَ بلوچ قوم پرست پارٹی یے ءِ کما ش ’’ اسٹینڈنگ کمیٹی برائے روڑ ھانی ویز‘‘ ءِ پاگواجہ ات واجہ داں ۵ سال ءَ فرانس ءُُ کابل ءَ وفد ءُُ ڈلانی کماشی کت بلئے بلوچستان ءِ دگ ءُُ سڑکانی چارگ ءَ نہ یتک ھمے رھشون کہ بنجاھی حکومت ءِ دیم ءَ بلوچاں نابود ءُُ بے سنچ گشت بلئے وتی اے دور ءَ بلوچستان ءِ یک تحصیلے ءَ ھم وتی بود ءُُ لائقی ءَ پیش دارگ ءَ سوبین نہ بوت ۔کراچی کوئٹہ آرسی ڈی وڑ کہ ۱۹۷۰ ءَ سردار عطا اللہ مینگل ءِ حکومت ءَ بنا کنگ بوتگ بلئے داں ۲۰۱۶ ءَ سرجم کنگ نہ بوتگ دومی دست ءَ بلوچستان ءَ ٹرانسپوٹرانی حال ھم ھمیش انت کہ اشاں ناں ترس ء حدا ھست ءُُ ننکہ بیم ء حکومت یابلکیں حکومت ءَ اے ٹرانسپورانی مہار بڈ ءَ داتگ کہ گوں بزگیں مساپر ءُُ لس مہلوک ءَ ھرچی کن انت بکن انت آھاں رزاانت اے درگت ءَ لس مہلوک ءُُ مساپرانی گشگ ھمیش انت کہ ٹرانسپورٹرز حکومتی باسک ءُُ واکداران سالے کروڑاں کلدار بھتہ دئینت پمشکہ وتی مرزی ءِ مالک انت اے وھد ءَ بلوچستان ءَ سپر کنگ نوں ارزانیں ءُُ سبکیں کارے نہ انت پریشی ءَ مزنیں ہمت ءُُ حوصلہ یے لوٹ ایت پرچکہ یک نیمگے ھرچ میل ءِ سرا چوکی ءُُ چیک پوسٹانی چیکنگ تا دومی نیمگ ءَ ھمے ٹرانسپورٹراں مساپرانی گوں بے آسراتیاں لٹ ءُُ پل ھم برجاہ انت دراھیں دنیا ءَ ٹرانسپورٹرانی اے ذمہ واری انت کہ مساپرانی آسراتی بدئینت بلئے بلوچستان ءَ پہ مساپراں ھچ وڑیں آسراتی نیست مکران ءَ دراھیں بساں اے وڑا جوڑ کنگ بیت کہ چہ بساں گیش ٹیلی ءِ ٹینکی انت ٹرانسپورٹ گوں اے ٹینکیاں آ مساپراں یکبرے کاراں حب چوکی ءَ ھیر کن اَنت اد ءَ چہ مساپر دگہ بساں سوار کنگ ءُُ ٹرمینل ءَ ھئیر گیجگ بنت پدا مساپر چہ ٹرمینل ءَ دگہ رکشہ ءُُ ٹیکساں وتی منزلانی نیمگ ءَ رھادگ بنت۔ اے وڑ ءَ مساپر سک تکانسر ءُُ جنجال بنت بلئے اگاں کسے ءَ مریض ءُُ نادراہ یے گون بہ بیت گڈاں آ دوسری جنجال ءُُ تکانسر بیت ۔اے دراھیں جاوراں ٹرانسپورٹراناں کس چست کنو ک نیست۔ دومی دست ءَ کوئٹہ کراچی دگ ءِ ٹرانسپورٹرانی حال اوں ھمیش انت یوسف گوٹھ ٹرمینل ءَ دراھیں بس چہ صدر ،لی مارکیٹ ءُُ سبزی منڈی ءَ کاینت نوں ھرچے مساپرے کہ یوسف گوٹھ ٹرمینل ٹکٹ کنت آ ٹرانسپورٹ اکارگساں نادینگ ءُُ ودار پرماھگ ءِ بدل لیاری ایکسپریس وے سرا اوشتارینگ بنت کہ بس داں صدر ،لی مارکیٹ، چہ سبزی منڈی ءَ بئیت ءُُ سوار بہ بیت۔اے میان مساپر لیاری ایکسپریس وے ءِ سرا سک جنجال بنت پرچکہ لیاری ایکسپریس وے سک رشیں سڑکے وت ٹرانسپورٹرانی جند ءِ گشگ ءَ ردا مساپرانی ادا گوزگ ءُُ ودار کنگ ءِ وھداں بازیں مساپرے دام بوتگ کہ آھانی تہا زھگ،جنین آدم ءُُ پیریں مردم ھوار انت۔ ھنچو مردم ءِ بیرانی ءَ ابید ھم مساپر انگت ھمے سڑک ءِ کش ءَ اوشتارنیگ بنت کہ نہ ایوکا بنی آدم توھین ءُُ بے عزتی انت بلکیں مزنین مطلمے ھم بلے پدا،بلوچستان حکومت ءِ گوش ءَ مورے وارت ءُُ نیکہ دگ ءُُ سٹرکانی بند و بوج کنوکانی سہب ءُُ بیگاہ چہ کراچی ءَ کوئٹہ روکیں گاڑیانی درآھگ ءِ وھد ءَ لیاری ایکسریس وے یوسف گوٹھ ٹرمینل ءِ دیم ءَ مساپر گوں وتی سامان ءُُ ساز ءُُ زھگ ءُُ چکاں سک تکانسر ءُُ جنجال انت اے جاوراں بلوچستان اسمبلی باسک ناں سڑکے جوڑ کت کنائینت کن انت ءُُ نیکہ ٹرانسپورٹراں پرمات کن انت کہ مساپرانی جنجال ءُُ تکلیفءَ کم بہ بنت البت مارا امیت کشگی انت کہ اے قوم پرست ساحل و وسائل ،ریکوڈک ،سیندک ،گوادر ءَ بلوچستان ءِ دست ءَ آرگ ءَ زلور چیزے کن انت۔
