تہران: ترجمان ایرانی وزارت خارجہ جبیری انصاری کا کہنا ہے کہ طالبان رہنما ملااختر منصور ان کے ملک سے پاکستان میں داخل نہیں ہوا۔ تہران میں ہفتہ وار میڈیا بریفنگ کے دوران ایرانی وزارت خارجہ کے ترجمان جبیری انصاری نے کہا کہ ایران افغانستان میں پائیدار امن اور استحکام کے لئے کی جانے والی مثبت کوششوں کی ہمیشہ سے تائید کرتا رہا ہے۔ 21 مئی کو ایران سے ملا اختر منصور یا اس حلیے کا کوئی بھی شخص سرحد عبور کرکے پاکستان نہیں گیا۔ ایران ایسی تمام باتوں کی سختی سے تردید کرتا ہے۔ واضح رہے کہ 21 مئی کو دالبندین میں امریکی ڈرون طیاروں نے ایک گاڑی کو نشانہ بنایا تھا جس میں دو افراد ہلاک ہوئے تھے ۔ ہلاک ہونے والوں کی شناخت محمد اعظم اور محمد ولی کے نام سے ہوئی تھی ، محمد ولی کے سامان سے ملنے والی دستاویزات کے مطابق وہ ایران سے آیا تھا، امریکا اور افغان حکام کا دعویٰ ہے کہ اس گاڑی میں سوار ایک شخص طالبان کا سربراہ ملا اختر منصور تھا جو کہ ایران سے پاکستان آرہا تھا۔