دو روچ ساری یکبرے پدا عالمی بینک ءَ پہ بلوچستان ءِ کشت ءُُ کشار ءُُ آپینکی ءَ ۲۰ کروڑ ڈالر ءِ جار جتگ ۔اے وھد ءَ ماں بلوچستان ءَ بازیں مزنیں پروجیکٹانی سرا کار برجاہ انت کہ آھانی تہا گوادر ڈیپ سی پورٹ ،میرانی ڈیم،سیندک ،ریکوڈک،حبکو پاور ءُُ گڈانی ءَ لانچانی پروشگ ءِ کار ھوار اَنت بلئے چہ اے درائیں مزنیں پروجیکٹاں بلوچ ءُُ بلوچستان ءِ لس مردم ءَ چے نپ ءُُ سیت رسگان اِنت؟ چدو ساری عالمی بینک ءِ نیمگ ءَ تھرڈ ایجوکیشن ءِ نام ءَ ارباں ڈالر آوھد ءِ وزیراں وتی کیسگاں جت انت اے ارباں ڈالر ھرچ کنگ ءَ ھم بلوچستان ءَ اسکولانی جاور ھال ایش انت کہ جاھے ءَ اسکولءِ تبک درچکے ءِ چیرااِنت ءُُ جاھے کاپرے ءِ چیر ءَ ۔اے بابت ءَ جست کنوکے نگواہ ایت، کہ عالمی بینک تھرڈ ایجوکیشن ءِ نام ھما زر ءُُ فنڈ حکومتی وزیراں دات اَنت آ،آ ھاں چون کت اَنت؟ ھمے وڑا گوستگیں دور ءَ ایشانی دیمروئی بینک ءَ واٹر مینجمنٹ ءِ نام ءَ بازیں زر ءُُ مالے بلوچستان حکومت ءَ دات انت چو تھرڈ ایجوکیشن ءِ وڑ ءَ واٹر مینجمنٹ ءِ نام ءَ ھم ادارگ جوڑ کنگ بوت بلئے جست کنگ بہ بیت کہ اے زر ءُُ مال ھما دھکان ءُُ زمین داراں داں سر بوت اَنت کہ آ ھانی حق دار انت؟ ھمے وڑا چہ درملکاں سالے ھزاراں اسکالر شپ بلوچ ءِ نام ءَ کیت بلئے اے اسکالرشپانی جار پرینگ نہ بنت اگاں بیت گڈاں جہد ھمے کنگ بیت کہ بلوچ دارگ بہ بنت’’بلئے وائے کہ بلوچ راج دوستانی گوشاں مورے اوں نہ وارت‘‘ادا ءَ لس مہلوک ءِ لوٹ ھمیش اِنت کہ برزی تک ءَ نیب ءُُ ایندگہ ادارگ بائدیں اے فنڈانی جست ءُُ پرس ءَ بکن اَنت بائدیں نوں بلوچ الس ءَ را اے گپ ءِ سرا ریپینگ مہ بیت کہ برزی تک ءَ فنڈ دئیگ بوتگ انت ءُُ وھدے کہ جہلی تک ءَ ورگ یا رد کارمرز بوتگ اَنت آ ،آھانی جندءِ مردمانی ملام اِنت۔ادا گپ ایش انت ملک ءُُ مردم یکین انت گڈا بلوچ الس ءَ را ’’ وتی ‘‘ ءُُ ’’ درآمد ‘‘ ءِ نام ءَ پرچہ بہر کنگ بیت ادا اے چارگ بہ بیت کہ ھما برزی تک ءَ کہ فنڈ دئیگ بنت ھما ءُُ ھما جہلی تک ءَ کہ فنڈ زورگ بنت یکسر زانگ بہ بنت، وتی زانگ بہ بنت اگاں جہلی ءُُ برزی تک یک ءُُ وتی زانگ بہ بنت گڈا بائدیں وتییانی فنڈانی کارمرزی گوں ھورت چاری چارگ بہ بنت کہ اے فنڈ کہ عالمی تک ءَ دئیگ بوھگان انت وتی جائزیں ءُُ حقی ایں جاہ ءَ کارمرز بنت اگاں کارمرز نہ بوتگ انت گڈا چار ءُُ ٹپاس کنوکیں ادارگ بائدیں گامگیج بزور اَنت ھنچو انوگیں وھد ءَ خالد لانگو ءِ بابت ءَ زورگ بوتگ ات ۔اگاں اے وڑیں گامگیج زورگ نہ بوت گڈا عالمی بینک ءِ اے ۲۰ کروڑ ڈالر ھم چو پیسریگیں تھرڈ ایجوکیشن ،واٹر مینجمنٹ ءُُ ایندگہ مزنیں پرو جیکٹانی وڑا پہ لس مہلوک ءَ بے سیت ءُُ نپ بنت ءُُ بلوچ مہلو ک ءِ دل ءَ پہ ریاست ءُُ حکومت ءَ دلگرانی ھمے وڑا برجاہ مان ایت۔
