فرانس میں جاری فٹ بال یورو سنہ 2016 کے مقابلوں میں اتوار کو فرانس نے آئس لینڈ کی ٹیم کو کوارٹر فائنل میں تین گول سے شکست دے دی ہے۔ فرانس نے پانچ گول کیے جبکہ آئس لینڈ کی ٹیم دو گول کر پائی۔ فرانس نے پہلے ہاف میں چار اور دوسرے ہاف میں ایک گول کیا۔ آئس لینڈ کی ٹیم نے دونوں گول دوسرے ہاف میں کیے۔ پرتگال، جرمنی اور ویلز کی ٹیمیں پہلے ہی کوارٹر فائنل جیت کر سیمی فائنل کے مرحلے میں پہنچ چکی ہیں۔ اب تک ہونے والے تینوں کوارٹر فائنل مقابلے بڑے سنسنی خیر اور ڈرامائی رہے اور تین میں سے دو کوارٹر فائنل میچوں کا فیصلہ پنلٹی ککس پر ہوا۔ یہ میچ جو پیرس کے مشہور فٹبال سٹیڈیم ’سٹڈ ڈے فرانس‘ میں کھیلا جا رہا تھا پہلے ہاف میں یکہ طرفہ نظر آ رہا تھا۔ فرانس کا سیمی فائنل میں مقابلہ جرمنی سے ہو گا۔