کراچی، لاہور: ملک کے مختلف علاقوں میں شوال کا چاند نظر آگیا، لہٰذا ملک بھر میں عید الفطر کل بروز بدھ کو ہوگی۔ مرکزی رویت ہلال کمیٹی کا اجلاس مفتی منیب الرحمٰن کی زیر صدارت 15 سال بعد لاہور میں محکمہ اوقاف کے دفتر میں ہوا، جبکہ زونل کمیٹیوں کے اجلاس اسلام آباد، کراچی، پشاور اور کوئٹہ میں ہوئے۔ رویت ہلاک کمیٹی کو لاہور، فیصل آباد، گجرانوالہ، ملتان، سانگھڑ، لوئر دیر، لورالائی سے شوال کا چاند نظر آنے کی متعدد شہادتیں موصول ہوئیں۔ شہادتوں کے معتبر ہونے کا فیصلہ کرنے کے بعد چیئرمین رویت ہلال کمیٹی نے چاند نظر آنے کا باقاعدہ اعلان کیا۔ قبل ازیں مفتی منیب الرحمٰن نے میڈیا سے بات کرتے ہوئے چاند کی شہادتیں موصول ہونے کی تردید کی تھی۔

اس موقع پر انہوں نے محکمہ اوقاف کے پی آر او پر غصہ ہو کر ان کے ٹیلی فون سیٹ کی تار بھی نکال دی۔ انہوں نے برہمی کا اظہار کرتے ہوئے کہا کہ چاند دیکھنے کی کوئی شہادت موصول نہیں ہوئی، جبکہ یہاں ہر کوئی اپنے طور پر چیئرمین بنا ہوا ہے۔ دوسری جانب پاکستان کے پڑوسی ملک ہندوستان اور بنگلہ دیش میں شوال کا چاند نظر نہیں آیا، لہٰذا ان ممالک میں عید الفطر 7 جولائی بروز جمعرات کو ہوگی۔ خیال رہے کہ گزشتہ روز سعودی عرب اور متحدہ عرب امارات میں شوال کا چاند نظر نہیں آیا تھا، جس کے باعث وہاں آج 30واں روزہ ہے اور عید الفطر کل بروز بدھ کو منائی جائے گی۔