انچو گشگ بیت کہ بنی آدم وتی بیرانی ءِ روچءَ نزانت ۔ اے ھبر ءَ ایوک ءَ واجہ ھدا ءِ جند زانت ءُُ آئی ءَ اے ھبر راز کتگ بلئے مرچی ہر ھما مردم زانتے کنت کہ آ بساں سپر کنت، پرچکہ ھمک بس ءِ تہا ملکموت سوار اِنت ءُُ ھمک روچ چیزے مردمانی ساہ ءَ گپت ، اے ھبر چہ کس ءَ چیر ءُُ اندر نہ اِنت کہ بسانی تہا سپر کنگ مرگ ءَ گوں گوازی کنگ ءِ ھساب ءَ اِنت ،ھمک روچ روتاک ءُُ ٹی وی آں ھمے گندگ بیت کہ’’ کوئٹہ ءَ چہ کراچی روکیں بسے راہ ءَ گوں دگہ کوچے ءَ دیم پہ دیم بوتگ ءُُ اے ٹکّر ءَ سے مردم بیران ءُُ پانزدہ ٹپی بوتگ یاکہ پلان پُل ءِ سرا پلان بس ترند گامی ءِ سوب ءَ چپی بوتگ ءُُ کپتگ ایشیءِ سوب ءَ پانزدہ مردم بیران ءُُ دہ مردم ٹپی بوتگ‘‘ چشیں ھبرءُُ ھال ھمک روچ گندگ بنت ، بلئے کسے ءَ اے جیڑیتگ کہ چشیں ٹکّر گیشتر گوں کوچ ءُُ بساں پرچہ بنت ؟، ایشی ءِ یک مستریں سوبے دونمبریں مالانی کار ءُُ باراِنت کہ بس ڈرئیوراں پہ وھد سر کنگ اَنت ءُُ دومی ھما تیل اَنت کہ بس ءِ تہا پُرکنگ بوتگ ءُُ آھانی منڈی ءَ مہلہ سر کنگ اِنت ۔مردمانی سواری پہ مپت ءُُ نام اِنت ۔
بسانی اگاں کد ءُُ بالاد چارگ بہ بیت داں ایشیءَ رامردمانی نندگ ءِ ھاترءَ کم ءُُ تیل ءُُ اے دگہ دونمبریں مالانی چیر دئیگ ءِ ھاتر ءَ ڈیزائین کنگ بیت۔ مرچاں تربت ٹرانسپورٹ ءِ بساں نوکیں بدّتے بنا کتگ آ وتی مساپراں نیم ءَ ایر کن اَنت بزاں حب ءِ نزیک ءَ درائیں مساپراں ایر کن اَنت وت وتی تیلانی لائینگ ءَ رواَنت آ اے نچار اَنت کہ ھمے مساپرانی تہا چک ءُُ زالبول ،پیریں مردم گون کہ سک باز جنجال بنت پدا وھداوں انچیں وھدے کہ حب ءَ دگہ بسے اوں دست گرگ نہ بیت ءُُ نیکہ دگہ لوکل گاڑی ءُُ ٹیکسی یے گندگ بیت، بازیں مساپر انچیں اوں است کہ آھاں پدا کوئٹہ ءُُ اے دگہ جاھاں روگے بیت آھانی اوں وھد زوال بیت بلئے اے کار زوالی ءِ سرا کس ھچی نہ گوشیت ،مساپر وتی دوسد یں کلداریں یلہ کنگ ءِ ھاتر ءَ ھاموش اَنت ،راہ ءِ پولیس وتی زر وری ءَ ھاموش اَنت، ھمے ٹرانسپورٹانی بازیں کارمستر وت سیاسی مردم اَنت پمشکا سیاسی سروک اوں ھاموش اَنت ۔کس ایشانی بابت ءَ ھچی گشت نہ کنت ۔بلئے انسانی زند کہ زوال بوھگ ءَ انت ایشی ءِ کس ءَ سد پر نیست انت ۔گوں تیلانی ھوار ءَ بس ءِ ترند گامی ھم یک بلاھیں جیڑگے آ بس ڈرائیور ءَ انچو اوں سد پر نیست کہ آتہنا نہ انت بلکیں بس ءِ تہاپنجاہ ،ششت مردمانی ساہ ھمائیءِ دست اِنت آ بائد وشگامی ءَ بروت ،بلئے چشں نہ اِنت ہریکے بسے دومی ءَ چہ گامے دیم ءَ انت ،شپ ءِ وھد ءَ اگاں کسے ءَ سپر کتگ داں زانت کہ بس ڈرائیور وتی نشہ ،مشہ آں کنت ءُُ نوں نیم وابی ءَ بس ءَ تاچیت آئیءِ چم پچ ءُُ بند بنت اگاں اللہ مہ کنت کہ آواب بہ کپیت ( کہ چشیں واکیا باز بوتگ) بزاں بس ءِ درائیں مردمانی مرگ!!۔ بلئے اے بابت ءَ اوں کس ھچی نہ گوشیت۔لس مردم وتی زور ءُُ تاکت ءَ چہ بے ھال ءُُ شموشکار اَنت ۔ اگاں آ بلوٹیت آ چے کت نہ کنت بلئے آئیءَ مرچاں ھاموش وتی سرا کت ءُُ ھرچی کہ بہ بیت آ بس ھاموش انت ۔تربت کہ بلوچستان ءِ یک نامدارءُُ مزنیں شہرے آئیءِ تہا کوئٹہ ءَ روکیں بس ٹرانسپورٹ یکے،بزاں’’ مشترکہ ٹرانسپورٹ‘‘ آئیءِ جاورال انچوش کہ مردگاں اوں کس چشیں بساں سوار نہ کنت نیکہ زندگیں مردمانی ،دنیا ءِ اے دگہ ملکاں نودربراں گیش ءَ چہ گیش آسراتی دئیگ بیت بلئے مشترکہ بس ءِ گیشتر سپر کنوک کہ نودر بر اَنت آھاں ھچ وڑیں آسراتی دئیگ نہ بیت ،اے ٹرانسپورٹ ءِ بس وتی کلینڈی ءُُ پرشت ءُُ پروش ءِ ھساب ءَ گپ نہ بیت پدا انچو باز ایشاں سامان لڈگ بیت کہ قانونی ھسا ب ءَ اوں رد انت بلئے جست کنوک نیست ۔مشترکہ ٹرانسپورٹ ءِ کارمستر دگہ ٹرانسپورٹاں اے دگ ءَ گوزگ ءَ نیلاں ،ءُُ نیکہ وتی بسانی جاور ءَ شرتر کن اَنت آھانی سرجم ءَ بس اتکگیں دو ءُُ سے اَنت کہ سرجمیں سال ءَ رو،آ ءِ تہا اَنت ایشانی جوڑ کنگ ءِ سرا اوں ھچی خرچ کنگ نہ بیت۔نہ ایشی ءِ تہا اے سی است انت کہ پرچکہ تربت ءِ ھند ءِ سک باز گرم انت ءُُ بس کہ سرجم ءَ بند انت ایشیءِ تہا مردم ءِ نپس بند بیت،بلئے اناں کس ءَ گوش ءَ مورے نہ وارت،ایشیءِ نندجاہ بزاں سیٹ انچو چل ءُُ لیگار اَنت کہ مردم ءِ دل بد بیت ،یک مردمے اے بس ءِ تہا چو نوک سوریں سالونک ءَ سوار بیت بلئے درکیت داں سے سالی آپ ندیستیں کلنڈر ءَ بیت۔
اے اسل ءَ ٹرانسپورٹ ءِ جیڑگ نہ انت اے مساپرانی جیڑگ اِنت بلئے ایشیءِ بابت ءَ کس روانکے در نہ کنت یکے بیانے ما روتاک ءُُ ھالرسانکی گلاں دیم نہ دنت۔بلئے وھدے ایوک ءَ ننداں داں جوانی ءَ اے ٹرانسپورٹانی بڈ ءَ کپ اَنت۔اے تہنا لس مردمانی ھم سرا نہ اِنت بلئے سرکاری سروکانی اولی ءُُ مستریں کار انت کہ آ وتی مردمان جوان ءَ چہ جوانتریں آسراتی بدیاں بلئے اے آسراتی یے بدلہ وڑوڑیں جنجال وتی لس مہلوک ءَ را دئیگ بیت ،پرچہ؟ پرچکہ نہ جست کنوک است ءُُ نیکہ جست گروگ ۔
چنائی ءَ اے ملک ءَ چہ مردم ءَ ھمے امیت ءُُ گمان است انت کہ اد ءَ ھچبر شرکاری بوت نہ کنت بلئے ھمے بدکار ی ءُُ بدکردی ءِ تہا لس مردمانی چونیں بلاھیں دست ھواری یے مان ایشیءِ سرا ھچبر کس جست چست نہ کنت ،بزاں مردم درائیں بدکاری ءُُ بدکردئیں وتی چماں گوں گنداں بلئے آئیءِ دارگ ءِ ھاتر ءَ گامگیجے نزوراَنت،آئی ءِ مدام گشگ ھمیش انت کہ مپتیں سردردے کئے سرا بہ کنت ،ھمے جیڑ گ انت کہ اے ملک نہ شربوتگ ءُُ نیکہ آوکئیں وھداں اے شر بیت،پرچکہ اے ملک ءَ کس وتی نہ کنت ،ہرکس ایوک ءَ وتی نپ ءُُ سیت ءِ گرگ ءِ پشت ءَ انت آئیءَ را گوں دگہ مردمانی نپ ءُُ سیتاں گوں ھچ سروکار نیت انت ھمے رنگ ءَ بس ٹرانسپورٹ وتی دونمبریں مال ءُُ تیل ءُُ زراں ابید دگہ ھچی ءَ گوں آھاں کارنیست ،آھاں مساپرانی آسراتی ،ءِ گمان است انت نیکہ آھانی زند ءُُ مرگ ءَ گوں کارے است ۔اے درائیں بدکردیانی اگاں دارگ ءَ سرکار ءُُ سیاسی سروک نہ کناں اَنت پرچکہ آ گچین کتگیں سروک نہ اَنت بلکیں پہ زور آورتگیں سروک اَنت پمشکا آ ھاں گوں لس مردماں ھچ سروکار نیست اے درائیں کار لس مردماں وتارا کنگی اِنت ،آئیءَ را وتی ھاموشی ءِ یلہ کنگی اِنت لوگ ءِ نندوگ ءُُ بد ءُُ زاہ کنگ یلہ کنگی اِنت بلکیں وتی ھک وتی جند ءَ را گرگی اِنت ایشیءِ ھاتر ءَ زارشانی کنگی انت داں دنیا ءِ مردم سہی ءُُ سرپد بہ بنت ،روانک درکنگی انت دانکہ کور ءُُ کریں سروکانی چم ءُُ گوش پچ بہ بنت ،یاکہ ھما ٹرانسپورٹ ءِ کارمسترانی غیرت جاہ بجنت ءُُ آ چشیں کاراں چہ توبہ،بہ کنت ءُُ مردمانی آسراتی ءَ دلگوش بدیاں ۔
انوگیں جاوراں چہ ھمے گمان بیت کہ اے یک نہ بوتگیں ھبرے بلئے اگاں کسے ایشیءِ ھاتر ءَ اولی گامگیج ءَ چست بکنت داں گام ءَ را گامے پر بیت ءُُ منزل ءَ سر بیت ،ایوک ءَ ھما اولی گام ءِ چست کنگ کلاں گران ءُُ سک تریں کار انت کہ کس آئیءِ زورگ ءَ ساڑی نہ انت ھرکس چہ وتی جند ءِ ترس ءَ گاراِنت۔
