خضدار : بابائے بلوچستان میر غوث بخش بزنجو کی 27ویں برسی کے موقع پر خضدار میں 11اگست کے جلسے کی تیاریاں عروج پرپہنچ گئیں ۔جلسہ عام میں صوبہ بھر سے پارٹی رہنماء اور ورکرز شرکت کریں گے ۔ بابائے بلوچستان میر غوث بخش بزنجو اسٹیڈیم خضدار میں نیشنل پارٹی کی جانب سے میر غوث بخش بزنجو کی 27ویں برسی کے موقع پر خضدار میں جلسہ عام منعقد کیا جارہاہے ۔ جلسہ عام کے لئے تیاریوں کا آغاز کردیا گیا ہے ۔ نیشنل پارٹی کے صوبائی رہنماء و میئر خضدار میر عبدالرحیم کرد نے بتایاکہ نیشنل پارٹی کی جانب سے بابائے بلوچستان میر غوث بخش بزنجو کی ستائیسویں برسی کے موقع پر خضدار میں شاندار جلسہ منعقد کیا جائیگا یہ جلسہ عام تاریخ ساز ہوگا ۔ جلسہ عام کے لئے تیاریوں کو حتمی شکل دی جارہی ہے جو بلوچستان کی تاریخ میں سنگ میل ثابت ہوگا ۔ انہوں نے کہ گزشتہ روز تربت میں بھی نیشنل پارٹی کی جانب سے تاریخ ساز جلسہ عام نے بھی سیاسی مخالفین کو حیران و پریشان کردیا ہے ۔ ہم میئر تربت اور دیگر ذمہ داروں کو مبارک باد پیش کرتے ہیں کہ انہوں نے جلسہ عام کو کامیابی سے ہمکنار کردیا اور انشاء اللہ اب 11اگست کو خضدار میں بھی تاریخ ساز جلسہ منعقد ہوگا اس مقصد کے لئے خضدار شہر اور سمیت پورے ضلع میں نیشنل پارٹی کے پرچم آویزاں کئے جارہے ہیں ۔
