8.8.2016 ءَ دوشمبے ءِ روچ ءَ کوئٹہ ءِ اے دومی تراک اَت کہ درائیں دنیا یے پہ دْرینت اے تراک ءَ پد کسی سرپر نہ بوت کہ اے تراک پرچہ کنگ بوت بزاں وکیلانی سرا پرچہ؟ چو وَ گشگ بوت کہ اے تراک سی پیک ءِ بدواھی ءَ کنگ بوتگ بلئے اے پشدرا گڈا 2016 ءِ کوئٹہ ءِ تراک ،کارساز ءِ تراک،کراچی بحریہ ءِ سرا ،واہ کینٹ ءِ سرا، نیشنل باغ ءَ بے نظیر ءِ سر ءِ تراک ،دراہ سی پیک ءِ بدواھی ءِ پندل اَنت؟؟؟؟ اے درچ ءَ تراک لہتیں ساھت ءَ رند اسلامی نظریانی کونسل ءِ چئیرمین ءُُ قومی اسمبلی ءِ باسک مولانا محمد خان شیرانی اے تران اشکنگ بوت کہ ’’ گوں راج ءَ دروگ بندگ مہ بیت ،سلہ بندیں گل کئی ئیگ اَنت؟ تچکا گشگ بہ بیت!‘‘ وانوک زان انت کہ اے تراک کہ آئی ءِ ڈبہ داعش ءُُ تحریک طالبان پاکستان ءِ چیری گل جما عت الاحرار ءَ زرتگ ھما وھد ءَ کنگ بوت کہ ماں بلوچستان ءَ ایمنی برجاہ دارگ ءَ بلوچ قبیلہاں یک قبائلی جرگہ ءِ برجم داشت ،چدوساری ڈاکٹر عبدالمالک ءُُ نواب ثنا اللہ زہری ءِ اے تران یکشل ءَ رسانک در ءَ وانگ بوتگ اَنت کہ بلوچستان ءَ ایمنی برجاہ دارگ ءَ سوبین بوتگیں ۔8 اگست ءِ اے تراک ءَ پد حیران کنوکیں گپ بلوچستان ءِ راج دوستیں پارٹی ءِ کماش ئیگ ات کہ اے وھداں بنجاھی وزیر انت تراک ءِ بیگا ءَ یک نیوز چینلے ءَ تران کنان ءَ آئی ءِ گشگ اَت کہ ’’ من حیرانوں کہ مردم من ءَ چیا فون کن اَنت ءُُ جست کن اَنت، آیا من تجزیہ کارے اوں ‘‘ دیم ءَ آئی ءِ گشگ ایش ات کہ ’’ مردم تجزیہ بکن اَنت تعزیت بکن اَنت بلئے من ایوکا اے ھاتر پددروں کہ مئے بازیں لائقیں مردمے ءُُ بازیں وکیلے کشگ بوتگ من حیرانوں کہ اے وڑیں سنچ ءُُ بودیگیں مردم ءِ ودی کنگ ءَ بلوچستان ءَ دگہ چنچو سال درکار بیت‘‘ اے گپ وتی جاہ ءَ تچک ءُُ راست انت کہبازیں بودناک سنچی ایں وکیلے کشگ بوتگ بلئے اے وکیلانی ھواری ءَ بازیں احوالکار ءُُ لس مردمے ھم بیران بوتگ ،آیا اے لس مردم ءُُ احوالکار بے سنچ ءُُ بے بود بوتگ اَنت ؟ دومی اے سنچ ءُُ بودیگیں وکیلانی رکینگ ءُُ پناہ ءِ ڈبہ کئی ئیگ اِنت پکا حکومت ئیگ انت گڈا حکومت ءَ کئے اِنت اگاں حکومت ءَ واجہ ءِ جند نشتگ گڈا مردم عمران خان ءَ فون بکن انت یا سیداحسان شاہ ءَ ؟ دومی واجہ ءِ اے گپ ءَ سر پر نہ بیت کہ بائدیں آ جارے بجنت کہ آ کشندھاں چون دزگیر کنت ؟ مرتگیں مردمانی پش پداں چون تسلہ ءُُ ھیرے بدنت آ اے گشگان اِنت کہ من اے جیڑگاناں کہ ھنچو سنچ ءُُ بودیگیں مردم پدا چون بلوچستان ءَ چنچو وھد ءَ ودی بیت؟ گپ ایش انت کہ وت اے ’’ حساب ءَ آ چہ کئے ءَ لوٹگان اِنت؟ پرچکہ حکومت ءَ آ وت انتَ اے ڈولیں ساھت ءَ بائدیں کتہ کاریں راجکاراے وڑیں گپ مجن اَنت کہ چرائی مہلوک شکّو بہ بیت اے وھد ءَ مردم ءِ دیم ءَ بائدیں وتی آکبت ءِ گامگیج گشگ بہ بنت تنکہ اے گرانیں ساھتاں پروشتگیں ءُُ درد آ ماچیں مردماں تسلہ ءُُ آسرا یے برس ایت ۔
’’ بے شک اللہ دلانی رازاں شرتر زانت‘‘۔
sacheenk.azadi@gmail.com
