گوستگیں روچاں ریوا اولیمپکس ءَ سے بلوچ جنک ءِ مدیہ غفور چہ ھولینڈ ،عائشہ البلوشی عرب امارات ءُُ ورحا البلوش چہ اومان ماں لیبانی برزیں سنداں سربوھگ ءَ پد بلوچ راج ءَ را وش ءُُ وشکام کرتگ اَت انت کہ آھانی تہا مدیہ غفور ریوا اولمپکس ءِ ۴۰۰235۴ میڑ ءِ تگ ءَ دومی سند گپتگ ات اے درچ ءَ چاگردی رسانک درءَ اے گپ پرشتگ ات کہ بلوچ اے وھد ءَ نپری حساب ءَ پاکستان ءِ مستریں راج انت کہ پنجاب ،سندھ کے پی کے ءُُ بلوچستان ءَ جاہ منند اِنت بلئے بدبختی ءَ بچار کہ اے وھد ءَ پاکستان ءِ عالمی لیب ءُُ گوازی وتی جاگہ دمگی ءُُ ملکی تک ءَ ھم چشیں ٹیمے نگواہ ایت کہ اودا بلوچے بہ بیت اگاں کہ پاکستانی ءُُ عالمی رسانک در دم پہ ساھت ءَ اے گپ ءِ گشگ ءُُ چک ءُُ پد نہ بنت کہ پاکستان ءَ راجکاری ءُُ زیمرءِ تک ھوار لیبی ءُُ گوازی ءِ مستریں بود ءُُ سنچ ماں لیاری ءَ ساڑی انت بلئے اولیمپکس ءَ بگرداں دنیا ءِ ایندگہ درائیں کنڈ ءُُ کنجاں کہ عالمی میڑ بنت پاکستانی لیبی یا وَ ھما ملکاں چہ رونت ءُُ گاربنت یا لیب ءُُ گیش وشکامی تروتاباں پد ملک ءِ دیم ءَ سیاہ کن انت ءُُ واتر بنت۔
ریوا اولیمپکس ءِ سوب مندیان پداگاں پاکستان ءَ واکدار بلوچانی سنچ ءُُ بود ءِ سرا بھروسہ باور بکن اَنت گڈا پاکستان لیبی دنیا ءَ یک جوانیں بستارے ءُُ ارزشتے ءِ واھند بوت کنت پرچہ بلوچ ءِ کر ءَ لیب ءُُ گوازی ءِ حاتر ءَ مزنیں سنچ ءُُ بودے ھست ایوک ءَ اے بود ءُُ سنچ ءَ را تراشگی انت بلئے اے درچ ءَ تنیگا دلگوش ھچ دئیگ بوھگ ءَ نہ انت لیب ءُُ گوازیان گوں سیادی داروکیں گل ءُُ مردم یا پاکستان ءِ برزی راجکار ءُُ بیوروکریٹس ءُُ فوجیاں وش کنگ لوٹ انت یا وتی سیاد ءُُ عزیز ءُُ سنگت ءُُ کہولان پمشکا اے سفارشی مردم بید ملک نام ءَ نوک کنگ ءَ گیشتر ملک ءَ بدنام ءُُ ازوار کنگان انت بلئے ادا چہ برزی سند ءُُ بنجاھی حکومت ءُُ ادارگاں مئے جند ءِ ھندی اسمبلی ءُُ راج دوستانی ھم مزنیں گناہ ءُُ ملامے کہ آھاں ناں اسمبلی ءَ کدی گپے جتگ ءُُ ننکہ وتی پارٹی ءُُ گلانی مجلس ءُُ دیوانان اے وڑیں دلرنجے ءِ درشان کتگ کہ پاکستان ءِ راجی ٹیماں ( فٹ بال،کرکٹ ،ھاکی،بیڈمنٹن،اسکوائش ءُُ ایندگہ) پرچہ بلوچ ورنائی دلبڈی کنگ نہ بیت؟ دومی نوں بائدیں مئے راج دوست نوں بلوچاں اے شگان ءَ مجن اَنت کہ بلوچ بے سنچ ءُُ بے بود اَنت پرچکہ سنچ ءُُ بود ھما وھد ءَ دیم کیت ءُُ درا بیت کہ آئی ءَ پیش دارگ ءُُ درا بوھگ ءِ موہ برس اِیت ۔ما دلمانگیں کہ بلوچستان اسمبلی ءَ کدی چشیں توارے مئے گوشان کپ ایت۔
