کراچی: مدرسہ پر نامعلوم مسلح افراد کا حملہ‘ دو افراد جاں بحق ہوگئے۔ تفصیلات کے مطابق کراچی کے علاقے گلشن اقبال میں موٹرسائیکل پر سوار دو نامعلوم مسلح افراد نے مدرسہ باب الاطفال میں گھس کر اندھا دھند فائرنگ کی جس کے نتیجے میں مفتی کامران اور مفتی غلام جاں بحق ہوگئے۔ مدرسہ میں فائرنگ کا واقعہ منگل کی صبح کو پیش آیا تاہم حملے کی وجوہات معلوم نہیں ہوسکی، پولیس حکام مزید تحقیقات کررہے ہیں۔ گزشتہ روز میڈیا ہاؤسز پر حملے کے بعد شہر میں خوف وہراس پھیل گیا تھا منگل کے روز بھی شہر میں خوف سائے منڈلارہے تھے تاہم کراچی کے چھوٹے بڑے تجارتی مراکز کے ساتھ ٹرانسپورٹ معمول کے ساتھ چل رہی تھی مگر زیادہ گہما گہمی دکھائی نہیں دی جس کی وجہ پیر کے روز پیش آنے والا ناخوشگوار واقعہ ہے۔ شہر میں سیکیورٹی فورسز کی گشت میں اضافہ کیاگیاتھا جبکہ جگہ جگہ چیکنگ بھی کی جارہی تھی۔