اسلام آباد : گوادر فری زون میں گذشتہ روز مفاہمت کی چار دستاویزات پر دستخط کئے گئے ، اس موقع پر وفاقی وزیر پورٹ اینڈ شپنگ میر حاصل خان بزنجو بھی موجود تھے ، اس سلسلے میں خصوصی سیمینار کراچی کے ایک مقامی ہوٹل میں منعقد ہوا ، سیمینار کا اہتمام پورٹ اینڈ شپنگ کی وزارت نے کیا تھا جبکہ میزبانی کے فرائض گوادر پورٹ اتھارٹی(جی پی اے ) اور چائنا اوورسیز پورٹ ہولڈنگ کمپنی (سی او پی ایچ سی ) نے ادا کئے ، مفاہمت کی یادداشت پر سکیورٹیز اینڈ ایکس چینج کمیشن آف پاکستان (ایس ای سی پی ) نارتھ ساؤتھ ٹرانسپورٹ نیٹ ورک (این ایس ٹی این )، ہیسکول پٹرولیم لمٹیڈ اور وہان ڈانگ چوان پائپ لائن کمپنی نے سی او پی ایچ سی کے ساتھ مفاہمت کی یادداشت پر دستخط کئے ، کراچی میں چین کے قائمقام قونصل جنرل مویانگ پینگ ، چیئر مین گوادر پورٹ اتھارٹی دوستین جمالدینی ، وفاقی سیکرٹری پورٹ اینڈ شپنگ بھی اس موقع پر موجود تھے ، چیئر مین سی او پی ایچ سی ژینگ باؤ ژانگ نے سیمینار کا باضابطہ افتتاح کیا اور اپنے خطاب میں غیر ملکی سرمایہ کاروں کیلئے گوادر فری زون میں پیش کی گئی مختلف مراعات اور سہولتوں کے بارے میں تفصیل سے آگاہ کیا جن میں کم ازکم ہینڈلنگ چارجز اور تیز رفتار کسٹمز کلیئرنس زمین اور ٹرانسپورٹ کے تحفظ کے بارے میںآگاہ کیا ۔ انہوں نے یہ یقین دلایا کہ گوادر فری زون میں تین ماہ تک کوئی ڈیمرج چارجز نہیں ہوں گے ، سامان کے تحفظ اور سلامتی کی بھی گارنٹی دی جائے گی ،سامان کو سٹور میں تین مہینے تک رکھنے کے لئے کوئی فیس ادا نہیں کرنا پڑے گی ، انہوں نے گوادر پورٹ کے خصوصی محل وقوع کے بارے میں بھی حاضرین کو آگاہ کیا اور سرمایہ کاروں کو دعوت دی کہ وہ ان اہم مواقع سے فائدہ اٹھانے کے لئے سرمایہ کاری کریں ، اس موقع پر چیئر مین گوادر پورٹ اتھارٹی دوستین خان جمالدینی نے گوادر فری زون کی پالیسیوں اور مقاصد کے بارے میں سرمایہ کاروں کو آگاہ کیا اور کہا کہ وہ اس موقع سے ضرور فائدہ اٹھائیں۔ اس موقع پر خطاب کرتے ہوئے مہمان خصوصی میرحاصل بزنجو گوادر بندر گاہ کے خواب کو حقیقی تعبیر میں بدلنے کیلئے چینی حکومت کی تعریف کی ۔انہوں نے وزیر اعظم نواز شریف کے اس عزم کو دوہرایا کہ گوادر کی بندر گاہ کی ترقی چینی بندر گاہ شینزن کی طرز پر کی جائے گی ۔ انہوں نے کہا کہ بندر گاہ بلوچستان کی معاشی سرگرمیوں کو بحال کرنے میں مدد گار ثابت ہو گی ۔ انہوں نے اس موقع پر پاکستان کی مسلح افواج کو خراج تحسین پیش کیا جو چینی انجنیئروں ، کارکنوں اور سرمایہ کاروں کو گوادر میں تحفظ فراہم کررہی ہے ۔
