اے گپ ءَ باز کم مردم سرپد اَنت کہ ریڈیو پاکستان کوئٹہ سینٹر ءِ ہما ٹرنسمیٹر کہ آہانی سرا بلوچی مراگش شنگ بنت گوستگیں دہ پری ایں سال اِنت کہ حراب انت کہ اے بابت ءَ بلوچی اکیڈمی ءِ گوستگیں بازیں جنرل باڈی دیواناں اے ٹرانسمیٹرانی حراب ءِ بابت ءَ منگ نامہ ( قرارداد) پاس کنگ بوتگ انت ءُُ ریڈیو پاکستان کوئٹہ بلوچ کلاّنہیں ساچکارانی ( پروڈیوسر) گشگ ءِ رد ءَ آہاں اے بابت ءَ مدام سیادی داروکیں واکداراں نبشتہ کتگ کہ ریڈیو پاکستان کوئٹہپ ءِ اے ٹرانسمیٹر جوڑ ءُُ شرکنگ بہ بنت بلئے ہچ پہ ہچ اے ساچکارانی گشگ انت کہ آہاں وتی گلہ ءُُ زنگ بلوچ زبان دوست ءُُ ربیدگ دوستیں راج دوستاں کہ آہانی کار رہبندانک( آئین) چہ اے وڑیں اوگام ءُُ سوگنداں سرریچ انت ہم گشتگ کہ آ پارلیمنٹ( سینٹ قومی اسمبلی ءُُ صوبائی اسمبلی) ءَ اے گپ ءَ بجن اَنت کہ گوں بلوچی زبان ءُُ ریڈیو پاکستان پرچہ چشیں ناروائی کنگان انت بلئے دھیں سالاں یک راج دوستے ءَ ہم پارلیمنٹ ءَ اے وڑیں گپے نہ جتگ اے وہد ءَ کوئٹہ ریڈیو بلوچی پروگرام لک پاس ءَ آدیم گوشدارگ نہ بنت کوئٹہ ریڈیو ءِ اے سوتکگیں ٹرانسمیٹرانی شرکنگ ءَ بازیں کلدارے پکار ہم نہ انت البت برزی سند ءَ نندوکیں واکدارانی دل بکش ات بس دومی دست ءَ ہالانی رد ءَ نوں بھارت ءِ وزیر اعظم نریندر مودی ماں آل انڈیا ریڈیو ءَ بلوچی پروگرام شنگ کنگ ءِ جار جتگ کہ اشکنگ ءَ ماں اے پروگراماں ملک ءِ ھلاپ پروپیگنڈہ کنگ بیت تنکہ بلوچ الس ءِ دل پہ ملک ءَ حراب ءُُ لیگار کنگ بہ بیت ءُُ بلوچستان ءِ جاور حال گیشتر حراب کنگ بہ بنت ۔پدرا انت کہ اے دور رسانک در ءِ دور اِنت اے دور ءُُ ہما مردم کہ رسانک در ءِ کارمرزی ءَ پشت کپت اَنت آ نوکیں دودمانی باریگ ءُُ زند ءِ درائیں تکاں پد مان انت پمشکا اے وڑیں نگیگیں جاوراں بھارت ءِ پروپیگنڈہ ءِ دیم ءَ دارگ مستریں وسیلہ ایش انت کہ کوئٹہ ریڈیو گوستگیں دہ سالاں سوتکگ ءُُ حرابیں ٹرانسمیٹر شرکنگ ءُُ گشاد کنگ بہ بنت تنکہ نوکیں دور ءَ بھارت کہ پاکستان ءِ ھلاپ زہر ریچی کنگان انت آہانی جواب ءُُ پسوماں بلوچی ءَ دئیگ بہ بیت اے درگت ءَ جوان تریں ریڈیواسٹیشن کوئٹہ ریڈیو اسٹشین انت ۔بائدیں دری کارانی وزارت ریڈیو پاکستان ءِ واکداراں کھڈن بکنت کہ بھارت ءِ پروپیگنڈہ ءِ جواب دئیگ ءَ ریڈیو پاکستان کوئٹہ سینٹر ءَ گشاد بکن انت پرچکہ اے کار کہ چہ ریڈیو اسٹشن کوئٹہ گرگ بوت کن انت آ چہ کیچ ،گوادر ءُُ خضدار ریڈیو اسٹیشناں بوت نہ کنت پرچکہ کوئٹہ بلوچستان ءِ سر شہر ( دارالحکومت) انت اِد ءَ ھرچ لیکہ ءُُ پگر ءِ مردم ساڑی اَنت کہ بھارت ءِ پروپیگنڈہ ءَ جواب ءَ دات کن اَنت پرچکہ رسانک ءِ درائیں وسیلہ کوئٹہ ءَ است اَنت کہ بلوچستان ءِ ایندگہ شہراں نیست اَنت ۔ اگاں اے درچ ءَ دری کارانی وزارت ءَ گامیگج نہ زرت ءُُ پی بی سی کھڈن نہ کت کہ آ بلوچی ءِ اے حرابیں ٹرانسمیٹراں جوڑ بکنت گڈا رسانک در ءَ بھارت پاکستان ءِ ھلاپ زہرشانی گیش بیت۔ہمے وڑا ایف ایم ۱۰۱ ءَ ہم بلوچی مراگش نیست اِنت بائد بنا کنگ بہ بنت تنکہ بلوچاں گوں پی بی سی ءَ دگہ گلہ ءُُ زنگے دل ءَ مہ بیت۔
