۶ اکتوبر ءَ بلوچستان ءِ سوجگراں ( نودربراں ) گوں پی پی پی بلوچستان ءِ رہشون روزی خان ءَ گند ءُُ نند کرتگ گشتگ کہ پی پی ءِ دور حکومت ءَ بنجاہی ءُُ پنجاب ءِ دمگی حکومت ءِ نیمگ ءَ جار پرینتگیں ھما درائیں داد ءُُ دئش ( اسکالرشپ) دئیگ نہ بوھگان اَنت کہ آھانی کول ءُُ کرار گوں بلوچستان ءِ حکومت ءَ کنگ بوتگ ۔
روزی خان ءَ گشتگ کہ بلوچستان ءَ وانگی ایمرجنسی ءِ نام ءَ بلوچستان ءِ سوجگرانی اے درائیں داد ءُُ دئش پچ گرگ بوتگ انت بلئے بلوچستان ءِ راج دوستیں گلانی رہشونانی گوشاں مورے نہ وارت ۔روزی خان ءِ گشگ انت کہ آھانی حکومت ءَ بلوچستان ءِ سوجگرانی ھاترا پنجاب ءِ کالج ءُُ یونیورسٹیاں گچینی نندانکی (Seat) ایرکنگ بوتگ ھمیشی ءَ ھوار بنجاہی حکومت ءَ لیپ ٹاپ ءِ ھم جار جتگ کہ نواز شریف ءِ حکومت ءِ اولی سال ءَ دئیگ بوتگ اَنت ۔ بلئے پدا روچ ء مرچی دئیگ بوھگان نہ اِنت روزی خان ءَ اے گپ گوں سوجگرانی یک ڈلے ءَ گند ءُُ نند ءُُ پد گوں رسانک در ءَ کتگ اَنت۔ اے درچ ءَ روزی خان ءِ اے گپ راست ءُُ تچک اَنت کہ وھدے سی پیک ءِ سوبین کنگ ءِ جار پرینگ بوتگ ات گڈابنجاہی حکومت ءَ بلوچاں رازی کنگ ءِ ھاترا اے وڑیں بازیں جار جتگ ات بلئے نوں وھدے چین ءِ تب ءُُ دم سی پیک ءِ پش درا گوں چاہ بہار ءَ کپتگ ءُُ بنجاہی حکومت سدک انت کہ چین نوں گوں چاہ بہار ءَ بیپارءَ دلمانگ انت پمشکہ بلوچستان ءِ بابت ءَ اے وڑیں جار کوھنیں دورءُُ باریگ ءَ یاتگیری زانگ بہ بنت ۔ اے درچ ءَ ایچ ای سی ءَ کہ پیش ءَ بازیں جارے پرینتگ آئی ءَ ھم وتی زبان وارتگ بلئے گپ ایش انت اے درائیں جیڑھاں گوں بلوچستان ءِ راج دوستیں گل پرچہ بے ترک ءُُ توار اَنت یا آ وانگی ایمرجنسی ءِ نام ءَ بلوچ ءُُ پشتون راج ءَ چہ وانگ ءَ زہبر کنگ لوٹ اَنت؟
