بلوچستان یکبرے پدا ھوناں اوژناگ اِنت ذی شاہ نورنی ءِ سرا اُرش بلوچ ءِ دل سپا،دل پہک ،بے کینگ ءُُ کستیں چاگرد ءَ را لیگار کنگ ءِ جہدانی سوبینی اِنت ناشراں زی بیگاہ ءَ شاہ نورانی زیارت ءِ سرا ارش کت کہ چرآئی ءِ سوب ءَ کساس ۴۰ مردم بیران بوتگ ءُُ دگہ ۱۰۰ مردم ٹپی اَنت شاہ نورانی یک کوہی دمگے کہ ضلع خصدار ءَ انت ۔شاہ نورانی زیارت ءَ چہ بلوچستان ءُُ در ءَ مردم پہ زیارت ءَ کاینت۔بازیں مردم پہ نیکراہی بھیسہ ءِ پشدر ءَ ادا کاینت بلئے بازین مردم پہ سیل ءُُ سواد ءُُ اے زیارت جلوناکی ءِ چارگ ءَ ہم کاینت بلوچستان ءِ نوکیں نیکراہی بے اوپاری پندل ءِ درچ ءَ اے ہما ناشریانی آسر اِنت کہ آئی ءِ بندات چہ ۲۰۱۳ ءَ راج دوستانی حکومت ءَ کنگ بوتگ اَت اگاں راج دوستانی حکومت ایشیءَ را ہم سی پیک ءِ سرا ارشے بگش ایت گڈا کس ابکہ ءُُ اجکہ نہ بیت بلئے سرپدیں مردم زان اَنت کہ اے ارش دیم ءَ پہ بلوچ چاگرد ءَ چنچو ترسناک ءُُ ناوش بنت ۔پرچکہ اے درگت ءَ باز کمیں مردم زان اَنت کہ اے ارش کنوک نام ءَ بلکیں بلوچ بہ بنت بلئے اے بلوچ،بلوچ چاگرد ءِ پدریچ نہ اَنت ہنچوکہ ملک ءِ بازیں زانتکار اشاناں زرباری پنجاب ءِ مدرسہانی پدریچ گشیت کہ اے نام ءَ بلکیں بلوچ بہ بنت بلئے وتی لیکہ ،پگر جہد تماہ ءُُ مول ءُُ مراداں بلوچ نہ اَنت پرچکہ بلوچ چاگرد ءَ بکال،گور ءُُ ایندگہ نیکراہی ٹکانی لیکہ داروکیں مردم چہ بندر ءَ جاہ منند بوتگ اَنت بلئے اشانی سرا ارش ءُُ زوراکی بلوچ چاگرد ءَ بے میاری یے زانگ بوتگ ۔بلوچ میار ءِ شون ایش بوتگ کہ جہلی ٹکانی مردمانی میار،گیرت ،ساہ ءُُ سر ،مال ءُُ ملکت ءِ پہازگ بہ بنت ۔بلئے لہتیں وھد انت کہ بلوچ میار، چاگرءُُ د ودمان ءِ دژمن چاگرد ءَ را لیگار کنگ ءِ پندل سازگان اَنت ءُُ دنیا ءَ سدک کنگان اَنت کہ بلوچ چاگرد بے اوپار ،بے صبر ءُُ تپاوت نہ سگّوکیں چاگردے بلئے بلوچ میار ءُُ چاگرد ءِ دوزواہ اے گپ ءَ سہی ءُُ سر پد انت کہ بلوچ چاگرد ءَ اوپار ءُُ سگ سک باز اِنت ءُُ بلوچ ءِ میار عالمی تکءِ میاری سندے ءِ واہنداِنت کہ آئی میار ءِ تیر نزور ءِ کمک ءُُ زور آور ءِ دیم ءَ اوشتگ ءِ منّگانی سرا اِنت ءُُ پمشکہ اے بلوچ چاگردی دودمانی ءُُ بن دپتری میار پہ اے ڈولیں پندلاں لیگار کنگ نہ بنت۔ دومی دست ءَ بلوچ میار ءِ دوزوانی مستریں بژن ءُُ افسوس ایش اِنت کہ اے درائیں کار ہما حکومت ءِ وھد ءَ بوھگان اَنت کہ آ وتار ءَ بلوچ راج ئدوستے گشیت ءُُ آھانی جہد ءِ بند دپتر دیمروئی دوستی ،انسان دوستی ءُُ نیکراہ ءُُ ٹکی لیکہانی تپاوتاں وتارا دور دارگ ءِ کول ءَ اَنت ۔ہمے راج دوست کہ وتارا چہ نیکراہ ءُُ تعصب ءِ لیکہاں دور کش اَنت ہمیشانی دور ءَ مکران ءَ ذگرکنوکیں مردمانی سرا گیشتریں ارش کنگ بوت انت نوں اے ارش ءَ درائیں بلوچستان ءَ برجاہ اِنت گپ ایش انت کہ راج دوستانی کماش وت گلاہی کن اَنت کہ ۱۹۸۶ ءَ وھدے مکران ءَ ذگری نمازی جیڑہ دیم ءَ آرگ بوت گڈا ہمیشانی جہداں اے جیڑہ روتگ جنگ نیلگ بوتگ بلئے مروچیگیں وانندہ اشاں اے جست ءَ کت کن اَنت کہ اگاں شما آ دور ءَ اے جیڑہ داشتگ گڈا مرچی حکومت ءَ بوھگ ءَ پد پرچہ اے جیڑہ ءَ داشت نہ کنئے ،؟؟پدرا اِنت کہ آ دور ءَ اے جیڑہ اے مردماں نہ داشتگ بلکیں آئی ءِ پشت دگہ گہیں مردبوتگ اَنت البت آہانی برورداں مرچی اے راج دوست گوں صوبائی ،قومی ءُُ سینٹ ءِ سیٹانی برکت ءَ ورگان اَنت بلوچ گش اَنت ’’ شیر پروش اَنت روبا ورنت‘‘، بلئے انوگیں جاوراں گمان اِنت کہ اے روباہانی ورگ ءِ باریگ ہم ہلاس بوتگ پمشکہ ماں مکران ءَ ذگری ءُُ بلوچستان ءِ ایندگہ دمگاں ایندگہ نیکراہی لیکہ داروکیں مردم وتی جاہ ءُُ زیارتاں سلامت نہ اَنت پدرائیں اے ارش ءِ سرا ہم ہمے گشگ بیت کہ ناشرانی سرین پروشگ بوتگ پمشکہ ارزانیں ءُُ زوت سر بوھگی جاہاں جن اَنت ‘‘ءُُ راج دوستانی اے تران دیم ءَ کیت کہ’’ چرے ارش ءَ آہاں سک بژن ءُُ افسوس بوتگ ‘‘ءُُ پدا یک کمیٹی ءِ جوڑ کنگ بیت ۔! عیش لیڈراں۔۔۔۔۔عیش وزیراں ۔۔۔!
