۱۹۴۹ ءَ وھدے چہ کراچی ریڈیو ءَ خیر محمد ندوی ءُُ آئی براہندگاں بلوچی مراگش بنا کنگ ءِ جہد بندات کت گڈا آھاناں ہمے گشگ بوت کہ بلوچی زبان ءَ چوکہ اے وھد ءَ ہچ تاکبند ءُُ کتاب نیست اِنت ، پمشکہ اے شنگی ( براڈ کاسٹنگ) ءُُ نبشتگی ( تحریری) زبانے نہ اِنت بلئے پدا سید ظہور شاہ ہاشمی ءَ اے براھندگاناں منّنیت کہ بلوچی نبشتگی ءُُ شنگی زبانے، ءُُ مرچی بلوچی درائیں دنیا ءَ شہ دربرجاہ ءُُ مزن شہ در برجاہاں وانینگ بوھگان اِنت۔ بازیں ریڈیو ءُُ آن لائن نیٹ، روتاک ،ماھتاک ءُُ تاکبند چاپ ءُُ شنگ بوھگان اَنت ۔ مرچی پولکاراں اے شاہدی داتگ کہ بلوچی اے دمگ ءِ کوھن تریں زباناں چہ یکے ءُُ اگاں اے زبان ءَ موہ دئیگ بہ بیت داں آئی ءِ تہا دیمروئی ءِ درائیں تک ءُُ پہنات است اِنت۔ ۱۹۴۹ ءَ کراچی ریڈیو ءَ بلوچی مراگش ءِ بنا بوھگ، ۱۹۵۱ اومان ءِ شنگ بوھگ ءَ پد بلوچی زبان ءِ ھاترا ۱۹۸۵ ءَ پاکستان زانتی ءِ بہرگ ءَ بلوچی وانینتگءُُ رندءَ بلوچستان مزن شاہ دربرجاہ ءَ بلوچی ڈیپارٹمنٹ ءِ بندات یک مزنیں چیدگے اَت۔ ہمے روچ ءَ پد بلوچی لبزانک ،بن دپتر ،زبان ،ربیدگ ءُُ دودمان ءِ دیمروئی ءَ بلوچی بہرگ ءِ مزنیں بہر ءُُ تکے ھوار اِنت۔پدا ۱۹۹۴ ءَ بلوچی چہ پاکستان زانتی ءِ بہرگ ءَ جتا ءُُ گستا یک بہرگے جوڑ کنگ بوت۔ اے بہر گءِ جوڑ کنگ ءَ عبداللہ جان جمالدینی ءُُ میر عاقل خان مینگل ءِ مزنیں دستے ھوار اَت ۔پدا بلوچی بہرگ ءِ دیمروئی ءَ میڈیم زینت ثنا ،ڈاکٹر عبدالصبور بلوچ ،رحیم مہر ءِ جہدانی مزنیں بہرے ھوار انت ۔اے وھد ءَ بلوچی بہرگ ءِ کماش حامد علی بلوچ اِنت کہ آئی ءِ کماشی ءَ بلوچی بہر گ ءَ را یک انسٹیٹیوٹے ءِ جہت ءَ دیم برگ ءِ جہد برجاہ اِنت ۔اے درگت ءَ گل خان نصیر چئیر ہم بلوچی بہرگ ءِ ارزشت داریں بہرے ،ہمے چئیر ءَ بانک نسرین گل ءِ کماشی ءَ اے وھد ءَ کساس ھبدہ کتاب چاپ ءُُ شنگ کتگ ۔بلوچی بہرگ ءِ بازیں نودربرے اے وھداں بازیں شہ دربرجاہ ءُُ مزن شہ دربرجاہاں پہ بلوچی زبان ءُُ لبزانک ءَ کار ءُُ ھذمت کنگ ءَ اَنت ۔ہمے سال ءِ بازیں ایم فل ءُُ پی ایچ ڈی اسکالرے چہ لبزانک ءُُ زبان زانتی ءِ تک ءَ دیم ءَ آھگان اِنت اے درائیں جہدانی برورد حامد علی بلوچ ءِ کماشی ءُُ اے دگہ سوجکارانی جہد ءِ مزاِنت کہ بلوچی بہرگ ءَ را یک انسٹیٹوٹے ءِ دروشم دیم ءَ آرگ بوھگان اِنت کہ بلوچی زبان ءُُ آئی دوزواہانی حاتر ءَ یک جوانیں گپے۔ ۱۹۴۹ ریڈیو کراچی ءَ مراگشانی بنا کنگ ءَ پد نوں بلوچی زبان ءُُ لبزانک ءِ بن دپتر ءَ دگہ چیدگے بلوچی بہرگ ءِ استادانی کمکءَ یک انسٹیٹیوٹے جوڑ کنگ بوھگ ءَ اِنت کہ پہ بلوچاں اے یک نیکیں پالے کہ ہمے زوتاں سرجم کنگ بیت ۔ بلوچستان مزن شاہ دربرجاہ ءَ بلوچی بہرگ ءَ ’’ انسٹیٹیوٹ آف بلوچیالوجی‘‘ جوڑ کنگ ،زبان ءُُ لبزانک ءِ دیمروئی ءَنوکیں گامگیجے زانگ بیت۔
بلوچیالوجی نہ ایوک ءَ زبان ءُُ لبزانک ءِ دیمروئی ءَ یک جوانیں گامگیجے بلکیں پہ نوک باھندیں اسکالر ءُُ ہما درائیں بلوچی بہرگ ءَ چہ رپتگیں نودربراں پہ زورگاری جوانیں درے اوں پچ کنت۔ چریشی ءَ گیشاں چہ گیش مردم بلوچی زبان ءُُ لبزانک ءِ دیم ءَ دلگوش بیت ۔ ءُُ راستی ءَ زبان ءِ اسل دیمروئی گوں ہمے گپ ءَ اِنت کہ آئیءِ نبشتہ کار ءُُ وانوک گیشاں چہ گیش بہ بنت۔چرے انسٹیٹوٹ ءِ بنگیجی ءَ اے اوں گمان دیم ءَ کیت کہ ، دیمتر ءَ مزن شہ دربرجاہ تربت ءَ اوں انچیں انسٹیٹیوٹے جوڑ کنگ بیت کنت ءُُ اے بوئگ اوں لوٹیت دانکہ زبان ءُُ لبزانک ءَ چد ءُُ گیش دیمروئی دئیگ بہ بیت۔
