ہنچو کہ گمان اَت بنجاہی حکومت گوں وتی درائیں ادارگاں لہتیں پختون رہشوناں ایر جیگ کت انت ءُُ وتی اے لوٹ منارینت کہ چہ افغانستان ءَ آوکیں لڈ ءُُ بار کنوکیں مردماں یک سالے انگت پاکستان ءَ نندگ ءِ اجازت بیت بزاں داں یک سالے ءَ انگت پاکستان ءِ حرابیں مالیت ءِ سرا اے مردم ڈبہ یے بنت ۔اے وڑا اے لڈ ءُُ بار کنوکیں افغان یک دگہ سالے مئے زبردستی ءِ مہمان بنت ءُُ اشاں پاکستان ءَ ہما درائیں آسراتی دست کپ اَنت کہ اے وھد ءَ بازیں پاکستانی چہ آھاں زبہر انت پیسرا اے شہواری کنگ بوت کہ لہتیں راجکاراں لوٹائینگ بوت ءُُ گوں آھانی شور ءُُ سلاہ ءَ اے سوڈگ کنگ بوت کہ افغان لڈ ءُُ باریاں داں دگہ یک سالے پاکستان ءَ نندگ ءِ اجازت دئیگ بیت پدا بنجاہی کابینہ ءِ دیوان بوت کہ آئی ءِ تہا اے گپ ءَ را منگ بوت کہ اے لڈ ءُُ باری داں آؤکیں دسمبر ءَ پاکستان ءَ نشت کن اَنت ۔چریشی ءَ پیسر وزیر اعظم ءَ یکشل ءَ اے جار پرینتگ کہ اے افغان لڈ ءُُ بار کنوک امبراں دسمبر ءَ وتی ملک ءَ پر تر انت ۔آئی ءِ اے جاری تران ءِ لبز سک ،سک اَت انت بلئے نوں ہمک سال اشانی نندگ ءِ وھد ءُُ پاس ودان انت۔ اسلءَ اے ملک ءِ حاکمانی کودکی واھگے کہ آ اے ڈول ءَ افغان حکومت ءِ مہروانیاں ذرت کن اَنت ءُُ افغانستان ءُُ چہ بھارت چنگل ءَ پچ گپت کن اَنت۔ ہمے ھاترا مئے حاکم بھارت ءَ ہارٹ آف ایشیا کانفرنس ءَ ھوار بوھگان انت پمشکا اے کانفرنس ءَ یک روچے ساری حکومت اے جار پرینتگ کہ افغان لڈ ءُُ بار کنوکیں مرد یک سالے انگت پاکستان ءِ مالیت ءِ سرا زندگ بہ بنت۔اے جار ایوک ءَ پہ افغان حاکماں وش کنگ ءَ ابید دگہ ھچے نہ اِنت ۔افغان پاکستان ءِ سرا ہچ وڑا باور نہ کن اَنت پمشکہ اے بے باوری ءِ وھد ءَ پاکستان ءِ حکومت بائدیں اے وڑیں گامگیج مہ زورایت اے درگت ءَ افغان راج ءِ جنجال ءُُ مشکل ہست اَنت آھانی مارشت مارا درساں است انت بلئے اے پاکستانی راج ءِ گناہ چی اِنت ؟؟ ایشیءِ مستریں گناہ گاریافغان جنگی سردار اَنت کہ باڑاہ ءِ سپائیگ انت ءُُ اے وھد ءَ درآمدانی جنگ ءَ وتی سرزمین ءَ کنگان اَنت ۔امریکہ ءُُ ایندگہ دیمروئی کتگیں ملکاں ارباں ڈالر افغانستان ءَ پہ دیمروئی ءَ داتگ اے درائیں ڈالر ہمے افغان جنگی سرداراں وتی یلیں جان ءَ جت اَنت اگاں افغانستان سک پد منتگ انت ءُُ وتی جند ءِ مردماں سنبال اِت نہ کنت گڈا ایشیءِ پاکستانی راج ءِ گناہ چی اِنت ؟ اے سوڈگ ءِ مطلب ءُُ مانا ہمش اِنت کہ حکومت اے مردمانی پاکستان ءَ جاہ مندی ءَ داں دسمبر ۲۰۱۷ ءَ مردم شماری نہ کنت ۔ نوں اے مردم شماری ۲۰۱۸ ءَ کنگ بیت پرچکہ اے مردمانی پاکستان ءَ جاہ منندی ءَ داں بلوچ مردم شماری ءَ نہ منّ اَنت بلوچ بنجاہ ءِ یک جوانیں بہرے اگاں بلوچ ءَ نہ من ات بزاں اے مردم شماری ویٹو بوتگ ۔البت ایشیءِ یک دروشمے زلور بوت کنت کہ حکومت اے افغان لڈ ءُُ بار کنوک ءُُ ایندگہ درآمدیں مردمانی تار جنوکیں کیمپاں بند بکنت۔
اے لڈ ءُُ باریاں چہ شہر ءُُ میتگاں گستابکنت شہر ءُُ میتگاں اشانی آھگ ءُُ روگ مہ بیت ۔اے وڑ ءَ اگاں بلوچ کماش ءُُ لس مردماں من اِت گڈا مردم شماری بوت کنت ۔بلئے اے بوت نہ کنت پرچکہ حکومت ءَ ہنچو سنچ ءُُ بود نیست کہ ہنچکیں مزنیں سوڈگے بزور ایت ءُُ عالمی براہندگاں وش ءُُ رازی کت بکنت کہ اشانی ورگ ءُُ وردن ایندگہ ہرچاں برداشت بکنت اے درچ ءَ بنجاہی کابینہ ءِ اے سوڈگ بژنی اِنت ۔پرچکہ لس مہلوک ءُُ پاکستانی راج یکشل ءَ اشانی درآھگ ءَ دلمانگ اِنت پمشکہ لس مہلوک پہ مجبوری اے سوڈگ ءَ زورگان اِنت گوں ہمے گپ ءَ لس مہلوکءِ لوٹ اش اِنت کہ اے لڈ ءُُ بار کنوکیں مردماں روزگار ءُُ ایندگہ مالی کاراں کار مہ بیت ۔اگاں کسے کارے ءَ یا بیپار ءَ گندگ بوت آئی ءَ را دزگیر کنگ بہ بیت ءُُ چہ ملک ءَ درکنگ بہ بیت ۔اے وھد ءَ اے افغان لڈ ءُُ بار کنوک ءُُ درآمدیں مردماں اے باور کنائنگی اِنت کہ اے ملک پاکستان اِنت ءُُ پاکستانیانی ئیک انت افغان لڈ ءُُ بار کنوکیں مردمانی نہ اِنت ۔آھانی حاتر گہتر اِنت کہ ذوت وتی بنجاہی ملک ءَ برو اَنت۔
