گوستگیں روچاں نامداریں قبائلی چاگردی ءُُ راجکاری نام حاجی لشکری رئیسانی ءَ بلوچستان ءَ افغان لڈوکی ئیں مردمانی جاہ منندی ءَ مردم شماری ءِ دارگ ءِ بابت ءَ یک مراگشئے ماں رئیسانی ہاوس کوئٹہ ءَ برجم داشتگ اگاں کہ اے کار بلوچستان ءِ راج دوستیں پارٹیانی ئیگ انت کہ آ اے بابت ءَ گامگیجے بزور انت بلئے چوکہ پارلیمنٹ ءِ تہا ءُُ در ءَ بلوچ راج دوستیں پارٹی سک نزور ءُُ نگیگ انت آہانی دلگوش چہ راج ءُُ سرڈگار ءِ ارزشت داریں جیڑھاں گیشتر وتی جند ءِ مال ءُُ ملکتی کاراں گوں بندوک انت وتی سیادانی دو نوکری ءُُ سے ٹھیکہ راج دوستانی مستریں جیڑھ انت ۔پمشکا سیند ک ،ریکوڈک ،بارڈر ٹریڈ ءُُ گوادر ءَ آپ ءِ جیڑہ اشانی کارانی لسٹ ءَ ہوار نہ انت بلئے حدا ءَ بلوچ ءَ دگہ مزن شانیں ءُُ پرآئی ءِ جیڑہاں پگر کنوکیں مردم ودی کتگ کہ آہانی تہا اے وھد ءَ یک نامے میر کبیر محمد شہی انت کہ پارلیمنٹ ءِ تہا مدام بلوچ جیڑہانی بابت ءَ وتی توار ءَ چست کنت دومی نام سردار یار محمد رند ئیگ انت کہ وھد ءِ سرا بلوچ جیڑھاں دیم ءَ کارایت بلئے اے درچ ءَ حاجی لشکری ءَ یک جوانین گامگیجے زرتگ ات کہ وتی لوگ ءَ بلوچ سرکیل ءُُ کماش مچ کت انت تنکہ بلوچ ءَ را افغان لڈوکی ئیں مردمانی جاہ منندی ءَ چہ اوگاناں کم حساب کنگ ءِ پندل ءِ دیم دارگ بوت بکت بائدایش ات کہ راج دوستیں پارٹیاں وت ماں وت ءَ یک مراگشئے بہ ٹہینت انت ءُُ یک ھواریں سوڈگے بکنت انت پرچکہ مردم شماری یک کسانیں جیڑھے نہ انت اے جیڑہ ءَ گوں بلوچ ءِ آکبت بندوک انت اگاں اشاں دگہ کارے کرت نہ کتگ ات بلوچستان اسمبلی ءَ بلئے پاس کتیں کہ آئی پلہ مرزی ءَ وت اے این پی ہم ساڑی انت بلئے عیب چہ باسکان انت البت اے درچ ءَ بی این پی ءَ جوانین گامگیجے زرتگ ات سپریم کورٹ ءَ یک پٹیشنے داخل کتگ بلئے ایوک ءَ پٹیشن ءِ داخل کنگ بس نہ انت پرچکہ کورٹ ایشیءِ حلاپ ءَ ہم سوڈگ کت کنت بلئے اگاں بلوچستان اسمبلی ءَ بلیّ یا منگ نامہ یے پاس کنگ بہ بیت گڈا کورٹ ءَ بی این پیءِ پٹیشن محکم تر بوت کنت دومی دست ءَ ہما گامگیج کہ حاجی لشکری رئیسانی زرتگ بائدیں بلوچستان ءِ ایندگہ مزن نامیں راجکار ہم وت ماں وت اے وڑیں سوڈگ بکن انت ءُُ وتی ہم پتیں مردماں گوں گپ ءُُ تران ءُُ نند ءُُ نیاد بکن انت تنکہ آہاں مارچ ءَ مردم شماری ءَ دارگ ءِ حاترا رازی کت بکن انت ۔زاہر انت حاجی لشکری رئیسانی وتی ہم پتیں پگر ءُُ مارشتی مردم بنت ءُُ ایندگہ مردمانی وتی اے بابت ءَ سندھ ءُُ پنجاب ءُُ صوبہ خیبر ءِ مزن نامیں بلوچ ہم وتی کردے پیش داشت کن انت چوکہ ذوالفقار کھوسہ ،لیاقت جتوئی ،اویس لغاری ،میر مزاری ءُُ ایندگہ بلوچستان ءَ سردار یارمحمد رند ،کبیر محمدشہی ،ءُُ شازین بگٹی ،اے مردم اگاں وت ماں وت بہ نند انت ءُُ سوڈگے بکن انت مئے نز ءَ چہ راج دوستیں نزوریں پارٹیانی کماشاں جوان تریں کارے کرت کن انت یا دومی دست ءَ چوکہ حاجی لشکری رئیسانی یک گامگیجے زرتگ بائدیں آئی ءَ دیم ءَ ببارت پرچکہ اے بوتگیں مراگش ءَ قبائلی ءُُ دل پہکیں مردمانی بدل ءَ گیشتر ہما پارٹیانی کماش بوتگ انت کہ پیسرا وزیر اعلی ٰ ،سینٹر ءُُ ایم پی اے بوتگ انت ۔اگاں اے مردماں زحمے جنگی بوت انت گڈا اشاں وتی پارٹیانی تہا جتگ ات یا اسمبلی ءَ۔ اے درچ ءَ حاجی لشکری رئیسانی بائدیں ہما مردماں گشاد بکنت کہ پارٹیانی تہا ءُُ اسمبلی ءَ نہ انت پرچکہ بلوچ گشنت آپ ءِ منتگ ءَ نیمگ درئیت۔
