بلوچ مہلوک ءِ چہ بندر ءَ ترس ہمیش اِنت کہ حاکم بلوچستانءَ بلوچ آبادیءِ کم کنگ ءَ وڑ وڑیں حیلہ بہانہ ءُُ پندل سازگان اَنت ۔البت ذی ہمے ترس ءُُ بیم ءِ گپ ہما راج دوستیں گل ءُُ مردماں جت اَنت کہ مرچی وت اسمبلی ءُُ سینٹ ءَ نشتگ ءُُ مردم شماری ءِ پلہ مرزیءَ کنگان اَنت( حال تاکی تران بے نہ اِنت) پرچکہ ۱۵ مارچ ءَ مردم شماری ءِ سوڈگ ماں مشترکہ مفادات کونسل ءَ زورگ بوتگ کہ آئی ءِ تہا راجی اسمبلی ءِ بلوچ باسک ءُُ چہ صوبہءَ وزیر اعلیٰ ءُُ چیف سیکرٹری گوں بوتگ انت نوں راج دوستیں گل ستر وتی نک ءِ تل ءَ بہ بر اَنت کہ ما ایشی ءِ پلہ مرزی نہ کتگ ،مردم گش اَنت کہ دروگ بنداَ نت ( نوں وَ ملک ءَ دروگ عیبے ہم نہ اِنت) پرچکہ وزیراعلیٰ ایوک ءَ ہچبر وت سوڈگ نہ کنت ہرچ سوڈگے کہ بیت آ بلوچستان حکومت ءَ ہواریں گلانی تپاکی ءَ گوں بیت آ دگہ گپے کہ راج دوستیں رہشون ماں اسمبلی ءَ دگہ ءُُ گوں وزیراعلیٰ ءُُ وتی ہم پتیں گلاں دگہ گپ کن اَنت ءُُ گوں ورکر ءُُ لس مہلوک ءَ دگہ۔بلئے اگاں بلوچستان اسمبلی ءَ نشتگیں راج دوست اے گش اَنت کہ اے مئے سوڈگ نہ اِنت، ایوک ءَ مسلم لیگ ئیگ انت گڈا بائدیں آ اسمبلی ءَ وتی دزکشی ءِ جار ءَ بجن اَنت پرچکہ آہانی اوگام ہمیش ا،نت کہ آ بلوچ راج ءِ تشخص ءُُ بقا ءَ دارگ ءُُ رکینگ لوٹ اَنت پرچکہ افغان مہاجرانی بلوچستان ءَ نندگ پہ بلوچ تشخص ءُُ بقا ءَ چہ سی پیک ءَ مستریں ترسے پدا افغان مہاجرانی بلوچستان ءَ نندگ ءُُ مردم شماری ءِ پلگاری، رپینگ ءِ حاترا جوانین گپے بوت کنت بلئے راستے ہچ وڑا بوت نہ کنت۔
بلوچ دوزواھانی رد ءَ چونا ءَ سی پیک ءِ درچ ءَ آؤکیں بیست سالاں بلوچ وت اے دمگ ءَ درآمدے بیت بلئے زاناں حاکماں ہمنچو ہم صبر نیست کہ سی پیک بندات بہ بیت ءُُ وت حاکمانی گشگ ءِ رد ءَ چہ د رائیں ملک ءَ لکھاں مردم گوادر ءُُ کش ءُُ گوْرا کیت ءُُ جاہ منند بیت ۔اے درچ ءَ زانگ نہ بیت کہ میرحاصل خان بزنجو ءِ اے ویژنری گپ ءِ سرءَ چنچو بلوچ گوشاں ٹپرین اِت کہ’’ بلوچ دگہ راجانی دیم ءَ دارگ ءَ وت گوادر ءَ جاہ منند بہ بنت زمیناں بزور اَنت ءُُ کارو بار بکن اَنت‘‘ بلئے اگاں افغان مہاجرانی بلوچستان ءَ بوھگ ءِ وہدءَ مردم شماری کنگ بیت گڈا پکا اِنت کہ افغان مہاجر چہ بلوچستان ءِ ہستیں پٹھان ءُُ بلوچاں گیشتر بنت ۔دومی دست ءَ براہوئی ءَ را جتا قومے ءِ درچ ءَ دیم آرگ بوھگان اِنت کہ حاکمانی کار ارزان بہ بیت کہ بلوچستان ایوک ءَ بلوچانی نہ اِنت بلکیں سے قومانی ئیگ اِنت بلوچ،براہوئی ،ءُُ پٹھان اے درگت ءَ اگاں بلوچ راج دوستیں رہشونانی دست نہ روت گڈا آ وتی حاکماں گوں اے لوٹ ءَ بائدیں متر س اَنت کہ بلوچستان ءَ مردم شماری ءَ ساری یکبرے ایوک ءَ افغان مہاجر انی حساب ءُُ شمار کنگ بہ بیت پرچکہ عالمی گل ءِ رد ءَ ۱۹۷۹ ءَ پاکستان ءَ ۵۰لکھ مہاجر اتکگ وہدیکہ مئے راج دوست وت گواہی دئینت کہ سی لکھ ،اگاں اے منگ بہ بیت کہ ۵۰ لکھ ۱۹۷۹ ءَ آتکگ گڈاپدا جست کنگ بہ بیت کہ اے مہاجرانی آھگ کدی بند بوتگ ؟پدا طالبانانی دور حکومت ءَ چنچو آتکگ ؟،پدا ۲۰۰۱ وھدے امریکہءَ افغانستان سرا گوں ۴۰ ملک ءَ یکجاہ ارش کتگ آ وھداں چنچو مہاجر آتکگ ؟ وزیرستان آپریشن ءَ چنچومہاجر بلوچستان ءَ آتکگ ؟مالا کنڈ آپریشن ءَ چنچو لڈ ءُُ بار بوتگ ؟پدا آپریشن ضرب عضب بنا کنگ بوتگ کہ اے وھد ءَ درائیں دنیا سہی ءُُ سرپد اِنت کہ پنجاب ءُُ سندھ دوئیں صوبہاں وتی بارڈر بند کت اَنت ءُُ ایوک بے رہشونیں ، بے ماتیں ،بے گلیں بلوچستان ءِ بارڈر پچ اَت اَنت ،اے وھد ءَ چنچو افغان مہاجر بلوچستان ءَ آتکگ ءُُ جاہ منندبوتگ؟ پدا اے گپ ءَ بگر کہ سوچ افغان مہاجرانی لڈ ءُُ بار ءَ، راج دوست وتی حاکماں اے لوٹ بکن انت کہ اے وھداں ہما مہاجرانی حساب چے اِنت کہ آھاں شناختی کارڈ جوڑ کتگ ،آہانی حساب چی اِنت کہ پاسپورٹ ءِ واہند اَنت ؟آہانی حساب چی اِنت کہ بلوچستان ءَ نوکری ءُُ اسمبلی ءُُ سینٹءَ مہاجرانی رہشونیءَ کنگان اَنت؟ آہانی ھساب چی اِنت کہ سریاب ءُُ چاغے ءِ سیٹ ءَ بر اَنتَ اے بابت ءَ بلوچ راج دوستیں گلانی کارندھانی اے ڈبہ ءُُ ذمہ واری اِنت کہ وتی رہشوناں اے جیڑھ ءِ سرا دوتل ءُُ دوپوستی ءَ میل اَنت ہمے وڑا بلوچ زانتکار ءُُ سرپدی ایں مردمانی ذمہ واری اِنت کہ وتی کرد ءَ اے وھد ءَ پیش بدار اَنت اگاں ناں بلوچ ءِ گار بوھگ ءَ سی پیک ءَ ماں مکران ءَ لکھاں مردم ءِ آہگ ءِ ھاجت نہ اِنت۔
