ھور ءُُ شرتگ پہ ابرم ءُُ ھدائی دادے ءِ دروشم ءَ رحمت بنت ءُُ ملک ءُُ راج ءِ ہشکاوگیں زمیناں میزرین انت چشیں جاہ ءُُ مقامے دنیا ءَ نیست کہ آ ئیود ءَ پہ ھور ءُُ شرتگ ءَ دعا کنگ مہ بیت ۔ہمے ھال پاکستان ئیگ انت کہ گوستگیں سال ءَ ملک ءِ صدر ءَ بگرداں درائیں وزیر ءُُ گزیراں پہ ھور ءُُ شرتگ ءَ دعا کتگ انت ءُُ اللہ ءِ گنجیں در ءَ ایشانی دعا ئے بگش کہ گریب ءُُ بزگرانی ارمان ءُُ واہش قبول بوتگ اَت بلئے اشکیں دعا ءِ لوٹگ ہم کار نہ دنت بلکیں ھور ءُُ شرتگاں رند آپانی گرءُُ دار اوں یک بلائیں گپے کہ ایشیءَ چہ کل بے زانگ انت ( چو گشگ نہ بیت کہ کلیں دنیا بلئے کم چہ کم مئے ملک ءِ وَ بے زانگ انت)بے زانگ اے ھاتر ءَ کہ وھدے ھور بیت داں آپ اسٹور کنگ نہ بنت ءُُ درائیں آپ پہ انچو تالانی ءَ زیان بنت ،آپانی اسٹور کنگ ڈیمانی دروشم ءَ بوت کنت بلئے اے ملک ءَ ڈیمانی کچ ءُُ کساس ایوک ءَ فائیلانی تہا نبشتہ اَنت بلئے راستی ءَ ڈیم دوریں گپے ڈیموکے اوں نگواہی۔۔۔ زانتکارانی گشگ انت کہ آوکیں وھد ءَ زمین ءِ آپ وتی جہلی ءِ پیش روانی ءَ چد ءُُ گیشتر کت کنت بزاں ہما چات ءُُ کہن کہ پیش ءَ سر ءُُ دستے ءَ آپ بوتگ انت مروچاں بیست ءُُ چل سراں داں آپ ءِ گواہی نہ بیت پمشکا اے درگت ءَ ڈیمانی یک بلائیں ارزشتے کہ آپ ءَ را پیش روانی ءَ نیلت ءُُ آپ ءِ تالانی ءَ سر بری کچ ءَ سر کنت ۔اگاں ڈیمانی کچ ءُُ کساس باز بہ بنت داں ہما ہند ءُُ دمگاں کہ آہود ءَ آپ ءِ تنگی بہ بیت آ ہنداں آپ ءِ رسینگ اوں بوت کنت ۔اے درائیں کار حکومت ءِ مستریں ڈبہ ءُُ ذمہ واری اَنت کہ حکومت چہ ایشاں پہک بے ھال انت ۔ہمے ھال صوبہ بلوچستان ءِ سری شہر بزاں کوئٹہ ئیگ انت کہ آپ ءِ تنگی است انت بلئے آپ اسٹور ءِ ہچ وڑیں آسراتی کنگ بوھگان نہ انت ۔دومی نیمگ ءَ آپ ءُُ دگانی گروداری گل پہک بے سما ءُُ واب انت کہ ھور ءُُ شرتگانی موسم ءَ درائیں آپ روڑانی بچ ءَ تالان انت کس چہ لوگ ءَ ہمے ترس ءَ دراتک نہ کنت کہ سرجمیں دگ چہ آپ ءُُ لچ ءَ چکار انت ۔درائیں مردماں سوار نیست انت ءُُ پدا بلوچستان ءَ کہ لس مہلوک پہ وت ءَ دو وہد ءِ ورگ ءَ اوں پہ ھذابے شوہاز کنت اے ڈولیں دمگاں سواری کج بیت مردمانی بلائیں کچ ءُُ کساسے پیدل سپر کنت ءُُ شہرءِ گشیتر مردم پیدل سپر کن انت بلئے اگاں دگانی آھال اے بہ بیت کس گشت مہ کنت گڈاں حکومت بائددرائیں مردماں سوار بدنت ۔یکے نیمگے ھور ءِ آپ روڑانی تالان انت ءُُ دومی دست ءَ گٹر لائن ءِ آپ اوں ھوری موسم بنت یا مہ بنت آ وتسر ءَ دیم سرریچ بنت ءُُ درائیں چاگرد ءَ سل کن انت اے درگت ءَ حکومت ءِ اڈ داتگیں ادارگ ءُُ گل بے سما انت ۔بائد حکومت چشیں گل ءُُ ادارگاں کڈن بہ کنت کہ وتی کار ءَ پہ پہک دلی بہ کن انت دانکہ مہلوک انچو ھذاب مہ بیت ڈنی ملکاں اوں ھور ءُُ شرتگ بیت بلکیں ہچ ملک ءَ گیشتر ھور بیت بلئے آھانی روڑ ءُُ ڈگ یک سہتے اوں چہ ھوری آپ ءَ سریچ نہ انت بلکیں ہما دمان ءَ درائیں آپ یا وَ گٹرلائن ءِ کمک ءَ چہ شہرءَ در کنگ بیت یاکہ آپ چنسین گاڑی درائیں دگانی آپ چنسان کن انت ءُُ دگ ءَ پہ سوار ءُُ پیدل ہردوکانی ھاترءَ آسودگ کن انت دانکہ کس چہ اے اڈ ءَ جنجال مہ بیت۔ حکومت بلوچستان ءِ مردم دیمروئی ءِ گپ ءَ کن انت بلئے گندگ ہمے بوھگان انت کہ روچ پہ روچ بے روزگاری گیش بوھان انت ءُُ دیمروئی ءِ جاہ ءَ پدمنتگیں ءِ چیدگ زاہر بوھگان انت ۔ایشیءِ مسال وت بلوچستان ءِ سر شہر انت کہ ساری اوں آپ پہ روڑانی دلبنداں تالا ن بوتگ ءُُ روچ ء مروچی ہمے آپ روڑانی دلبند ءَ تالان انت ۔ھور ے نہ بیت ،برپگواری یے بیت نہ بیت درائیں مزن دگ بند بنت روآ بند بیت ،مردم دگ ءُُ روڑانی سرا گوں زالبول ءُُ چکاں درائیں شپ جنجالی ءِ آماچ بنت بلئے حکومت گشیت کہ دیمروئی کار تیز ی ءَ کنگ بوھگان انت ۔
