۲۱ فروری دنیا ءِ ماتی زبانانی عالمی روچ اِنت ۔میان استمانی تک ءَ اے روچ ءَ اے حاتر ءَ دارگ بیت کہ مزنیں ملکاں باز زبان کارمرز بیت ءُُ ملک ءِ جند ءِ یک مستریں زبانے بیت اودا ایندگہ کستریں ( ملکی پش در ءَ ) زبان گار ءُُ بیگواہ مہ بنت پرچکہ میان استمانی تکءُُ راجدوست ءُُ زبان دوستیں زانتکارانی گمان ہمیش انت کہ دنیا ءِ بازین تکاں زوراوریں ملک وتی سیمراں ہواریں نزوریں راجانی دودمان ،ربیدگ ءُُ زباناں نزور ءُُ جہل تر گمان کن انت ءُُ اے زباناں رودگ ءِ موہ ءُُ آسراتی دئیگ نہ بیت ۔اے درچ ءَ زبانانی گاری ءِ مستریں ترس ءِ آماچ ذرباری ایشا ءِ راج انت چوکہ بھارت ،ایران،افغانستان ءُُ پاکستان زبانانی عالمی روچ بندر ءَ یونیسکو ءِ نیمگ ءَ ۱۷ نومبر ۱۹۹۹ ءَ دارگ بوت پدا میان استمانی گل ءِ جنرل اسمبلی ءَ ۲۰۰۸ ءَ ۲۱ فروری ءِ روچ پہ ماتی زبانی حاترا نامینت تنکہ دنیا ءَ ماتی زبانانی رکینگ ءِ حاترا سرپدی ءُُ زانت تالان کنگ بوت بکنت ۔ چہ ۲۰۰۸ ءَ ہمک سال ۲۱ فروری زبانانی عالمی روچ ءِ درگت ءَ درائیں دنیا ءَ برجاہ دارگ بیت ۔اے روچ ءَ درائیں ملکاں ماتی زبان ءِ ارزشت ءُُ بستار دیم ءَ آرگ ءِ حاترا مراگش ءُُ دیوان برجم دارگ بنت ۔ بلئے اے درائیں مراگش ءُُ دیواناں ابید ہم زرباری ایشیا ءَ بازیں راج وتی ماتی زبانانی رکینگ ءُُ پہازگ ءِ حاترا ترس، بیمءُُ بدگمانی ءِ آماچ انت پرچکہ بازیں ملکاں حکومتی واکدار مراگش ءُُ دیواناں کسانیں زبانانی رکینگ ءِ جار ءُُ اوگاماں جن انت بلئے وتی کار ءُُ گامگیجاں اے زبانانی دیمروئی ءِ حاترا ہچ وڑیں گامگیج نزور انت بلکیں بازیں زباناں زور دارگ ءِ جہدءَ ہم کن انت ۔اے درگت ءَ مستریں درور بلوچی زبان انت کہ انوگیں حکومت ءِ نیمگ ءَ آئی ءَ اسکولاں وانینگ ءِ جار پرینگ بوتگ بلئے بلوچی زبان ءِ کتابانی سرا بندش ہم ہمے حکومت ءَ جتگ کہ آئی ءَ اسکولاں وانینگ ءِ جار پرینتگ۔اے وہد ءَ پاکستان ءَ بلوچی زبان ایوکیں زبان انت کہ بلوچستان ءُُ ایندگہ صوبہاں آئی ءِ کتابانی سرا بندش انت اے وہد ءَ ہرکس ملک ءَ بلوچی کتاب ءِ وانگ ءُُ دست ءَ کنگ ءَ ترس ایت کہ آ مگے دزگیرکنگ مہ بنت ۔اے یک زبانے ءِ حاترا ءَ سکیں نگیگیں جاورے ۔انو ں ہپتگے ءَ پیش یکبرے پدا کیچ ءَ بلوچی کتابانی سرا بندش جنگ بوتگ ۔ بلوچستان ءِ بازیں دمگاں ۲۰۱۳ ءِ حکومت ءِ آہگ لائیبریری ءُُ کتاب جاہانی سرا چھاپہ جنگ بوتگ۔ ہمے ترس ءَ بازیں دمگ ءِ مردماں وتی لوگ، کتاب جاہ ءُُ لائبریر یاں بلوچی کتاب در کتگ انت یاکل کتگ انت ءُُ بازیں جاہاں مردماں مانداشتگ انت اے سکیں بژنی گپے کہ ۲۱ کرن ءَ مردم چہ سرکار ءِ ترس ءَ وتی کتاباں مان بدار انت؟
۲۱ فروری ماتی زبانانی عالمی روچ ءِ درگت ءَ مئے گوں واکداراں دزبندی انت کہ یک لیکہ یے ءِ پش درا بائدیں بلوچی کتابانی سرا بندش دور کنگ بہ بیت تنکہ بلوچی زبان ہم ایندگہ زبانانی وڑا دیمروئی کت بکنت۔ پرچکہ اگاں بلوچی کتابانی سرا ہمے وڑا بندش ءُُ نادوستی برجاہ بوت گڈا بلوچی زبان دوستیں مردم پہ حکومت ءَ گیشتریں حسد ءُُ کینگے دار انت ۔اگاں حکومت ءِ نیمگ ءَ بلوچی زبان ءِ حاتر ءَ مہر ءُُ وشی یے درشان کنگ بہ بیت مردم ہم پہ حکومت ءَ ہنچیں جوزگے درشان کن اَنت۔
