بلوچستان ءِ حقی ایں آبادی سک کم انت اے درچ ءَ بائدیں بلوچستان ءَ بے روزگاری ایندگہ دمگاں (صوبہ آں) کم تر بوت انت بلئے بدبحتی ءَ بلوچستان ءَ بے روزگاری چہ ایندگہ درائیں دمگاں گیشتر انت اے بابت ءَ وش تریں گپ ایش انت کہ ۲۰۱۳ ءِ گچین کاریاں ساری وہدے بلوچستان ءَ راج دوست ءُُ وتن دوستانی کہ حکومت نہ بوتگ ‘روزگار گیشتر بوتگ ءُُ مہلوک مالی بابت ءَ وشحال تر بوتگ بلئے وہدے ۲۰۱۳ ءَ راج دوست ،زبان دوست ءُُ وتن دوستانی حکومت کہ اتک بلوچستان ءَ بے روزگاری ءِ کچ ءُُ کساس گیشتر بوت پدا بلوچ مہلوک ہما وہد ءَ حیران ءُُ ابکہ بوت کہ وہدے بلوچستان ءِ چیف سیکریٹری سیف اللہ چھٹہ ءَ جار جت کہ بلوچستان ءَ ۳۶ ہزار نوکری گوستگیں دہ سالاں ہالیگ انت ۔بازیں مردمانی گشگ انت کہ اے نوکریانی کچ کساس ۱۳۶ ہزار انت چیف سیکریٹریءَ چہ بدنامی ءَ رکگ ءِ حاترا ایوک ءَ ۳۶ ہزار گشتگ۔ اے بابت ءَ بژنی گپ ایش انت ۲۰۱۳ ءِ گچین کاریاں پد ایوکیں حاکماں گوں وتی رعیت ،مہلوک ءُُ ووٹراں یک رچ ءَ دروگ بستگ کہ بلو چستان ءَ ہالیگیں نوکری ءِ جاہ ءُُ درنیست۔ مہلوک ءِ گلہ ءُُ زنگ ایش بوتگ کہ اے راج ءُُ وتن دوست کہ حاکم ءُُ اختیار دار انت پرچہ نوکیں نوکری ودی نہ کن انت؟ بلئے چیف سیکریٹری ءِ جار ءَ پد وت اشانی جہلی سندءِ رہشون اجکہ بوت انت کہ وہدے ہنچو نوکری بوتگ گڑا ایشاں پرچہ گوں مہلوک چو دروگ بستگ ؟ دومی اے راج ،زبان ،وتن دوستانی گوں وتی جند ءِ راج ءَ اے دروگ ءُُ ملنڈی ءِ مول ءُُ مراد چے بوتگ۔۔۔؟ پرچکہ سندھ ءُُ صوبہ خیبر ءَ راج دوست ءُُ زبان دوستاں اے بہتام جنگ بوتگ کہ اشاں وتی حکومتی ءِ دور ءَ وتی زبان ءُُ راج دوستی ءِ پشدر ءَ وتی پارٹی ءِ کارند ،ہم زبان ءُُ ووٹراں گیشیں نوکری داتگ۔ وہدے اشانی حکومت ءَ نوکری ہلاس بوتگ انت گڑا اشاں نوکیں نوکری ودی کتگ ۔ اے وہد ءَ ن لیگ حکومت پی پی ءُُ اے این پی حکومت ءَ اے بہتامءَ جنت کہ پاکستان اسٹیل میل ءُُ پاکستان پی آئی اے ءُُ ایندگہ ادارگانی تباہی ءِ مستریں ذمہ وار ہمے پارٹی انت کہ اشاں وتی ہم زبان ءُُ ہم ربیدگاں اے ادارگانی تہاگیشیں نوکری داتگ بلئے بلوچستان ءُُ بلوچ ءِ بابت ءِ اے معاملہ ءَ چپ انت کہ یک نیمگے ہمے راج دوستانی حکومت ءِ وہد ءَ مردم چہ بے دوائی ءُُ درمان ءَ مرت انت پرچکہ اشاں گشت دمگی حکومت ءِ کر ءَ فنڈ ءُُ زر نیست کہ اے وتی مہلوک ءُُ ووٹراں بدئینت بلئے دومی نیمگ ءَ ہمے حکومت ءَ وتی پارسی ءِ جار ءَ جنت کہ بلوچستان حکومت ءَ ۴۶ ارب کلدار سر گیتکگ کہ بلوچستان ءِ مہلوک ءَ ایشانی زلورت نہ انت ۔ہمے وڑ ءَ یک نیمگے بلوچ مہلوک پہ دو وہد ءِ نان ءَ شدیک ءُُ بزگ انت کہ آہاں پہ کار ءُُ روزگار نیست بلئے دومی نیمگ ءَ چہ پنجاب ءَ اتکگیں چیف سکیریٹری جار جنت کہ بلوچستان ءَ اے وہدءَ ۳۶ ہزار نوکری ہالیگ انت ،میاریگ کئے انت؟ دومی دست ءَ ہما بلوچ پارٹی انت کہ حکومت ءَ ہواریں پارٹیانی سرا ایراد گر انت کہ مہلوک ءَ نوکری ءُُ روزگار ندینت بلئے ہمے پارٹیاں جست کنگ بہ بیت کہ اشاں پہ بلوچ ءِ نوکری ءُُ روزگار ءُُ مالی گہتری ءُُ وشحالیءِ حاتر ءَ چونیں گامگیج زرتگ کہ آ گلاہگ ءُُ ساڑاہگ بہ بنت؟ اے درچ ءَ وہدے بلوچستان ءِ چیف سیکریٹری جار پرینتگ کہ ۳۶ ہزار نوکری ہالیگ انت گڑا اے پارٹیانی کرد چے بوت؟ پدا حکومت تنگا اے نوکریانی پرکنگ ءَ پرچہ گامگیج نہ زرتگ؟
