دود ءُُ ربیدگ ہمک راج ءِ پجار ءِ مستریں بن ءُُ بنزہ اِنت۔دنیا ءِ درائیں زندگیں راجاں وتی دود ءُُ ربیدگانی پہازگ ءَ وڑ وڑیں کارگشادیاں گوں گلائش اَنت۔بید دوداں درائیں انسان یک اَنت ہمے دود ءُُ دودمان اَنت کہ ہمک ہند ءِ انسان ءَ را چہ دو ہند ءِ انسان ءَ جتا ءُُ آئی ءِ جتا پجاری ءَ کنت۔ چشکہ ہم کار کہ یورپی ملکانی دوداں ہچ ہراب لیکگ نہ بیت چشکہ مردین آدم ءُُ جنین آدم یکجاہ نندگ ءُُ ورگ چرگ اے عیباں شمار نہ بیت بلئے بلوچ دوداں اے یک عئیبے زانگ بیت ۔ہمے ڈولیں دگہ بازیں ربیدگ اَست انت کہ یکے دومی ءَ گوں یکڈول بنت ۔بلوچ قوم اوں دنیا یک کوہنیں دودمانے داریت آئیءِ ربیدگ ءُُ دودانی توسیپ ءَ دری قوماں اوں کتگ ۔دومارچ ءِ روچ پہ بلوچ دودمانی روچ ءِ جہت ءَ چیزے سال انت کہ پہ ڈولداری ءَ جم دارگ بوہگ ءَ انت ۔بلوچ ربیدگانی روچ ایشیءَ بلوچ ربیدگانی یک جوانیں شونداتی زانگ بیت ۔ربیدگانی پجار وتی جند ءِ پجار انت بزاں ایشیءِ مستریں بزانت ہمیش اِنت کہ دنیا ءِ درائیں مردم ءُُ قوم سرپد بہ بیت کہ بلوچ اوں یک عہدی قومے است اِنت ءُُ ایشیءِ وتی جند ءِ دودمانی یک بلائیں لڑے است انت ۔بلوچ دودانی پجار ایوک ءَ مادی نہ اِنت بلکیں ایشیءِ مستریں ءُُ جوانتریں پہنات غیر مادی اَنت بلوچ ءِ زبان ،بلوچی ءِ میار داری،مہمان داری،باہوٹی ، میڑھ ءُُ مرکہ ءُُ اے دگہ بازیں چنائی ءَ پہر بندگی حبر اے نہ اِنت کہ اے دود مئے گورا ءَ ( بزاں بلوچانی ) است اَنت پرچکہ اے درائیں میار داری دنیا ءِ بازیں قومانی تہا است انت۔بلئے اسل چیز اے درائیں دودمانانی وتی ہمروچیگیں زند ءَ کارمرزی اِنت ءُُ اے چارگ بہ بیت کہ بلوچ چنچو گوں وتی ہمے دودمانی پہازی ءَ کن اَنت ۔ ایوک ءَ پاگ ءِ سر کنگ ءُُ کوش ءِ پاداں کنگ ءَ کس وتی دوداں پہازاِت نہ کنت پہازی ہماوہد ءَ بیت وہدے ما وتی استیں کرد ءِ پداں ایشیءِ درانگازی ءَ کن اَنت کہ من بلوچے آں دروگ بندگ پمن عئیب اِنت،من بلوچے آں میار ءِ پد جنگ پمن عئیب اِنت،من بلوچے آں پہ باہوٹی ءَ سر قربان اِنت ،من بلوچے آں منی مہرانی پتر پہ ہمک کس ءَ پچ اِنت ءُُ دگہ بازیں وہدے اے درائیں دوداں ،اقداراں من وتی اسل زند ءُُ کرد ءَ دیم ءَ بیار اَنت گڈا من بلوچے آں ،دو مارچ ءِ روچ ءَ شر اِنت یک شُگلے ءُُ مردمانی چیزے وتی جند ءِ لہتیں چیریں نپ ءُُ فائدگانی سوب ءَ ہمے روچ ءِ جم دارگ ءَ چاڑکگ گندگ بنت ۔ بلوچ ربیدگی روچ ءِ درگت ءَ امبری اوں دو مارچ پہ مڑاہ ئے جم دارگ بوتگ اَنت اگاں چہ بازیں ہنداں اے روچ ءَ پرے ہاترا جم دارگ نہ بوتگ۔ کہ اے دمگاں جاور حال گیگ نہ بوتگ انت ۔دومی گپ اِش ہم زانگ بہ بیت کہ دود دارگ ءَ گیشتر زورگی چزے۔ دود پہ دارگ ءُُ زندگ نہ بنت بلکیں پہ زورگ ءَ زندگ بنت اے درچ ءَ بازیں جاہ ءُُ ادارگ کہ بلوچ ربیدگی روچ ءَ دارگان اَنت آہانی مول مراد ایش نہ انت کہ بلوچ ربیدگ زندگ بہ بیت پرچکہ ربیدگ ءَ زندگ دارگ ءِ حاترا دگہ بازیں گامگیج ہم زورگ نبت کہ نہ بوھگان انت اے درگت ءَ دنیاءَ گیشتر اے پیش دارگ بوہگان اِنت کہ بلوچستان پاکستان ءِ ایمن تریں صوبہ انت ءُُ بلوچستان ءَ بلوچاں ہچ وڑیں جیڑہ ءُُ جکانسری نیست درائیں بلوچ شادمان ءُُ گل اَنت۔
