سیول: جنوبی کوریا کی سپریم کورٹ نے کرپشن کیس میں مبینہ طور پر ملوث خاتون صدر پارک گیَن ہے کو اپنے عہدے سے برطرف کردیا۔

خاتون صدر کے خلاف جنوبی کوریا کی پارلیمنٹ نے مواخذے کی قرار داد منظور کی تھی، جسے عدالت نے درست قرار دیتے ہوئے خاتون صدر کو عہدے سے برطرف کرنے کا حکم جاری کیا۔

خیال رہے کہ خاتون صدر پارک گین ہے پر اپنے اختیارات کے ناجائز استعمال اور پنی سہیلی کے ساتھ مل کر اربوں روپے کی کرپشن کرنے کے االزامات ہیں۔

عدالتی فیصلے پر پارک گین ہے کا فوری طور پر رد عمل سامنے نہیں آسکا۔

خاتون صدر پر الزام تھا کہ اس نے اپنی سہیلی شوئی سون سل کے ذریعے کئی اداروں سے پیسے بٹورے، جب کہ ان پر سہیلی کو سرکاری دستاویزات تک رسائی دینے اور سرکاری اجلاسوں میں اجازت دینے کے بھی الزامات تھے۔

برطرف صدر کے حامیوں نے عدالتی فیصلے کو مسترد کیا—فوٹو: اے پی

کرپشن اسکینڈل سامنے آنے کے بعد ان کی دوست کو گرفتار کرلیا گیا تھا، جو تاحال جیل میں ہیں، جب کہ صدر کو عہدے سے ہٹاکر نگراں صدر مقرر کیا گیا تھا۔

خاتون صدر کے خلاف کرپشن کیس کا مواخذہ پارلیمنٹ میں بھیجا گیا تھا، جسے پارلیمنٹ نے گزشتہ برس 10 دسمبر کو کرپشن کے خلاف عالمی دن کے موقع پر منظور کیا تھا۔

پارک گین ہے کے خلاف مواخذے کی تحریک بھاری اکثریت سے منظور ہوئی تھی،ایوان کے 300 ارکان میں سے 234 نے صدر کے خلاف ووٹ ڈالے تھے۔

مواخذے کی منظوری کے بعد پارک گین ہے نے پارلیمنٹ کا فیصلہ قبول کرنے کا اعلان کرتے ہوئے کہا تھا کہ ‘میں جنوبی کوریا کی عوام سے معافی مانگتی ہوں جو میری لاپرواہی کی وجہ سے انتشار کا شکار ہوئی’۔

خاتون صدر کو برطرف کرنے کا حکم بھی خاتون چیف جسٹس نے دیا—فوٹو: اے ایف پی

غیر ملکی خبر رساں ادارے’اے ایف پی‘ کے مطابق جنوبی کوریا کی خاتون چیف جسٹس لی جنگ می نے خاتون صدر کو عہدے سے برطرف کرنے کا حکم جاری کیا۔

جنوبی کوریا کی خاتون چیف جسٹس کی جانب سے خاتون صدر کو ملک کے سب سے بڑے عہدے سے ہٹائے جانے کا فیصلہ خواتین کے عالمی دن کے محض 2 دن بعد آیا پیش ہے، جب کہ صدر کے خلاف کرپشن کا مواخذہ کرپشن کے عالمی دن کے موقع پر منظور کیا گیا تھا۔

خیال رہے کہ اسی کرپشن اسکینڈل کیس میں جنوبی کوریا کی کمپنی سام سنگ کے وائس چیئرمین کے خلاف بھی تحقیقات جاری ہیں۔

سام سنگ کے وائس چیئرمین لی جائے یونگ پرالزام ہے کہ انہوں نے جنوبی کوریا کی معطل خاتون صدر پارک گوین ہے کی دوست کو 3 کروڑ 60 لاکھ ڈالر رشوت دینے کی پیشکش کی۔

عدالتی فیصلے کے خلاف مظاہرے، 2 افراد ہلاک

پارک گین ہے کے حامیوں اور پولیس میں تصادم بھی ہوئے—فوٹو: اے پی

سپریم کورٹ کی جانب سےصدر کو برطرف کیےجانے کے احکامات کے بعد پارک گین ہے کے ہزاروں حامی سڑکوں پر نکل آئے اور انہوں نے عدالتی فیصلے کے خلاف مظاہرے شروع کردئیے۔

پولیس اور فوج کی جانب سے پارک گین ہے کے مشتعل مظاہرین کو منتشر کرنے کے دوران تصادم کے نتیجے میں کم سے کم 2 افراد ہلاک ہوگئے۔

غیر ملکی خبر رساں ادارے ایسو سی ایٹڈ (اے پی) نے پولیس اور ہسپتال انتظامیہ کے حوالے سے اپنی خبرمیں بتایا کہ پولیس اور مظاہرین کے درمیان تصادم میں زخمی ہونے والے 2 افراد ہسپتال میں دم توڑ گئے۔

پولیس اور ہسپتال انتظامیہ نے ہلاک ہونے والے افراد کی مزید تفصیلات بتانے سے انکار کرتے ہوئے بتایا کہ ہلاک ہونے والے ایک شخص کی عمر 70 سال ہے۔