اسلام آباد: وزیراعظم نواز شریف نے گزشتہ ماہ بند ہونے والی پاک افغان سرحد کو فوری طور پر کھولنے کے احکامات جاری کر دیئے۔
وزیراعظم نواز شریف نے پاک افغان سرحد فوری طور پر کھولنے کے احکامات جاری کرتے ہوئے کہا کہ سرحدوں کا زیادہ دیر تک بند رہنا عوامی اور معاشی مفاد کے لئے نقصان دہ ہے۔ ان کا کہنا تھا کہ جذبہ خیر سگالی کے تحت پاک افغان سرحد کو کھولنے کا فیصلہ کیا تاہم امید ہے کہ جن وجوہات کی بناء پر سرحد بند کی گئی تھی افغان حکومت ان کا تدارک کرے گی۔
وزیراعظم نے کہا کہ پاکستان میں امن و سلامتی کے لئے افغانستان میں دیر پا امن نا گزیر ہے اور دہشت گردی کے خاتمے کے لیے افغان حکومت سے تعاون جاری رکھیں گے۔
واضح رہے کہ حکومت پاکستان نے گزشتہ ماہ افغانستان سے دہشت گردوں کی آمدورفت روکنے کے لئے افغانستان سے ملحقہ طورخم بارڈر اور چمن گیٹ کو ہر قسم کی آمدورفت کے لئے بند کر دیا تھا۔
