وفاقی وزیرداخلہ چوہدری نثار کا کہنا ہے کہ پاکستان میں چند سیاستدان اور جماعتیں سیاست کے نام پر عوام کو بیوقوف بنانے کی روش پر چل نکلی ہیں سیاست کو بدکرداری اور کرپشن کا ذریعہ بنانے والے افراد سیاست اورجمہوریت دونوں کے لئے زہرقاتل ہیں۔
واہ کینٹ میں بلدیاتی نمائندوں سے خطاب کرتے ہوئے وفاقی وزیرداخلہ چوہدری نثارکا کہنا تھا کہ انتظامی مشینری اور بلدیاتی نمائندے اپنی ذمہ داریوں کا احساس کرتے ہوئے عام آدمی کی طاقت اور آواز بنیں اور عوامی رابطہ مہم کو مزید تیز کرتے ہوئے مسائل کی نشاندہی اور ان کے حل کے لیے میری معاونت کریں۔ تعلیم صحت، پینے کے صاف پانی،کرپشن جیسے مسائل کے حل کی ضرورت ہے۔
وزیر داخلہ کا کہنا تھا کہ سیاست کو بدکرداری اور کرپشن کا ذریعہ بنانے والے افراد سیاست اورجمہوریت دونوں کے لئے زہرقاتل ہیں، پاکستان میں چند سیاستدان اور جماعتیں سیاست کے نام پر عوام کو بیوقوف بنانے کی روش پر چل نکلی ہیں اور ایسے لوگ نہ کسی سیاسی جماعت کے وفادار ہیں اور نہ ہی کسی اصول یا عوامی مفاد پر کھڑے ہوسکتے ہیں عوام کو چاہئے کہ وہ سچ ،جھوٹ، ثابت قدمی ، مفاد پرستی، سیاست اور تجارت کرنے والوں کےدرمیان تفریق کریں۔
