لزانک ہما زندگیں چیزءِ وڑ ءَ اِنت کہ آئیءَ را ورد ءُُ وراک ءِ ہر دمان حاجت بیت ،آئیءِ وراک لبزانک ءَ نوک نوکیں تجربت ءُُ آئیءِ ہما تک ءُُ پہناتاں نبشتہ کنگ کہ آئیءِ ہما وہد ءَ حاجت بہ بیت ۔بلئے بیاکہ بلوچی زبان ءِ تہا نبشتہ کار وَ باز اِنت بلئے لبزانتکار نیست اِنت ۔ایشیءِ مستریں سوب بے وانگی اِنت ،بے وانگی ءِ مراد اِیش اِنت کہ ہما چیز ءَ کہ نبشتہ کار نبشتہ کنگ ءَ اِنت یا کنگ لوٹ ایت آئیءِ بابت ءَ وت جوانی ءَ پوہ ءُُ سرپد نہ اِنت۔پمشکا آچیز ہما تہر ءِ چہرگ ءَ نہ جنت ءُُ ہما پڑا نبشتہ بوہگءَ پد اوں آ ہورک ءُُ ھالیگ زانگ ءَ کیت ۔لبزانک ءِ کجام ہم یک پڑے بزور کہ آئیءِ تہا جوانیں دیمروئی اتکگ نگدکاری بہ بیت،شاعری بہ بیت یاکہ ردانکی اے دگہ تہرے بہ بیت ہما چیزءَ کہ نبشتہ کار وت نبشتہ کنگ ءَ اِنت آئیءَ ایوک ءَ ہمائی ءِ بابت ءَ دگہ یک مردمے ءَ چہ ایش کتگ یاکہ کتابے ءِ پشتی تاکے ءَ ہمائی ءِ بابت ءَ ایوک ءَ یک نبشتانکے وانتگ ۔نوں یک نبشتانک ءِ وانگ یاکہ دگہ یک مردمے ءَ چہ اش کنگ ءَ ہما بلائیں پڑ کہ اے دگہ دنیا ءَ آئیءِ جتا نبشتہ کار بنت آئی ءِ نبشتہ کنگ ءَ وَ انچوش بیت کہ آئیءِ سوڈگ بوت نہ کنت ۔دومی گپ اے اوں دیم ءَ کیت کہ ہرکس ہمک پڑ ءَ وت ءَ شیوار سرپد بوہگان اِنت ءُُ ایشیءِ سوب ءَ آیک پڑے ءِ نبشتہ کار بوت نہ کنت ۔ پمشکا آئیءِ درائیں نبشتگیں مواد نیم شلونگ ءُُ کپی چنڈی سما بنت ۔اے گپ ءَ بلکیں ہما مردم زانت کت بہ کنت آئیءَ وت یک پڑے زرتگ ءُُ ایوک ءَ ہمائی ءِ پداں کار کنگ ءَ اِنت ۔اے گپ نہ انت ہمک مردم ایوک ءَ یک پڑے ءِ مساپر بہ بیت بلئے شرط ایش اِنت اگاں آئی ءَ دو ءُُ سے پڑ گون ءُُ ہماآہانی سرا کار کنگ ءَ انت گڈاں بائد ہمیش اِنت کہ آ ہما دو ءُُ سے ایں پڑانی بابت ءَ اشکتگیں گپانی پدا نبشتہ مہ کنت بلکیں وت ہما پڑ ءِ بابت ءَ جوانی ءَ سرپد اوں بہ بیت ۔بلوچی لبزانک ءَ گوستگیں بازیں سالاں انچش بوہگ ءَ اِنت کہ ہرکس ہپت رنگی ءَ نبشتہ وَ کنگ ءَ اِنت بلے اگاں آئیءَ را ہما پڑ ءُُ تہر ءِ پشدر ءُُ دپتر ءِ بابت ءَ جست بہ بیت داں آ پسو دات نہ کنت اے ڈول ءَ آ نہ ایوک ءَ وتی جند ءَ بیتال کنگ ءَ اِنت بلکیں وتی ہمرائی ءَ سرجمین بلوچی لبزانک ءَ کنڈ ءُُ تہاریں گارے ءَ دور دئیگ ءَ اِنت ۔پمشکا چشیں ندکار باید کڈن کنگ بہ بنت ءُُ آہانی ہر ہما مواد کہ چاپ ءُُ شنگ ءِ لاحق نہ اِنت آ دارگ بہ بیت ءُُ آئیءِ ہچ ڈول ءَ دلبڈی کنگ مہ بیت بلکیں آئیءَ را گشگ بہ بیت پیسرا بروت ءُُ ہما پڑ ءِ بابت ءَ جوانی ءَ بوان ایت ءُُ آئیءِ رگ ءُُ ریشگاں سرپد بہ بیت ۔گڈاں زبان ءُُ لبزانک ءِ پڑ دیمروئی کت کنت ۔ہمے حال بلوچی زبان ءِ جیڑگانی اِنت کہ انگت ءَ گشوار نہ بوتگ اَنت ۔کسے ءَ ایشیءِ بابت ءَ پگر کتگ کہ اے جیڑگ پرچکہ گشوار بوہگ ءَ نہ اَنت ایشیءِ مستریں سوب ہمیش اِنت مئے تہا زبانزانت نیست اِنت بلئے زبان ءِ درائیں جیڑگانی بابت ءَ وتی شور ءُُ صلاح ءَ الم آھود ءَ گون ءُُ ہوار کنت ۔ اے ڈول ءَ زاہر اِنت بلوچی زبان ءِ جیڑگ گشوار نہ بنت بلکیں انگت مانگش اَنت ءُُ ہچبر شری ءِ نیمگ ءَ شت نہ کن اَنت ۔بلوچی زبان بہ بیت یا لبزانکی پڑ دانکہ مردم دھوکہ دئیگ ءُُ ہپترنگی ءَ یلہ مہ کن اَنت ہر دو پڑانی دیمروئی کنگ یک نہ بوتگیں کارے زانگ بیت۔پمشکا دیمروئی ءِ ھاترا المی اِنت کہ وانگ بہ بیت ءُُ دل پکی ہم۔۔
