۱۹۵۰ ءَ وہدے نوکر شاہی ءَ خواکہ نظام الدین ءِ حکومت ھلاس کت ہما روچ ءَ پد نوکرشاہی ءُپ آئیءِ کاردار دمگی جیڑگانی حلاپ ءَ کار بندات کت ۔اولی روچ ءَ ایشانی کوشش ہمے بوتگ کہ پاکستان ءَ یک طرزی حکومت بہ مانیت ءُُ وفاق بنگواج کنگ بہ بیت۔۱۹۵۰ ءِ ہما لیکہ داں روچ ء مرچی اوں گندگ بیت ۔اولی ارش نوکرشاہی ءَ ون یونٹ ءَ گوں کت چریشیَ پاکستان ءِ یک دمگے بزاں بنگال چہ ایشی ءَ جتا بوت۔۱۹۶۵ ءَ وہدے بنگالی ءَ زارشانی کت داں پنجاب ءِ ھاکماں پہ اے زارشانی ءَ پدر بوت کہ نوں آہانی دور حاکم ءَ چہ اے ہنداں ھلاس اِنت ۔۱۹۶۹ ءَ مارشل لا ءَ رند ءَ وہدے بنگال جتا بوت داں ون یونٹ ءِ ہم ھاجت نہ بوت پمشکا آ اوں بند کنگ بوت۔پنجاب ءِ حاکماں رند ءَ اے اوں مارت کہ آ درائیں دمگانی سرا حکومت کت کناں پمشکادگہ کسانیں دمگ جوڑ کنگءِ حاجت اوں نہ انت اے کاررہبند داں روچ مرچی یکشل ءَ برجم انت ءُُ ایشیءِ ھلاپ ءَ کس ءَ گپ جت نہ کت۔ اے گپ وتی جاہ ءَ راست ءُُ تچک اِنت کہ ۱۹۷۳ ءَ لس مہلوک ءِ گچین وَ بوت بلئے ھدا مرزی بھٹو ءَ ایشی ءِ دوام ءَ پیسر ایشی ءَ را اجب جاہ ءِ باہوٹ جوڑ کت ءُُ لس مہلوک سرپدی دات کہ کانود اجب جاہ( میوزیم) ءَ ایرکنگی چیزے راستیءَ کارمرزی کنگی نہ اِنت ۔چرایشی ءَ لس بلوچ دستگیر کنگ ءُُ زانداناں بندیگ کنگ بوتاں پرچکہ آہانی بنجل ءَ ون یونٹ ءَ پد ہما اَت۔راستی ءَ اگاں چارگ بہ بیت داں پاکستان ءِ است ءُُ نیست وفاقی حکومت ءِ منوگر نہ اَنت بلکیں آہانی طرز شاہ ءُُ بادشاہانی ئیگ اِنت ءُُ آ چہ ایشیءَ درکپگ نہ لوٹ اَنت۔بٹھو ءَ بگر داں بیا نواز شریف ءِ دور ءَ درائیں حاکمانی وڑ ءُُ پیم یک بوتگ ۔ایشیءِ یک زندگیں درورے ۱۸ کانودی ترمیم اِنت کہ اے وہد ءَ پاکستان ءِ ۶۰ احوال کاری ٹی وی چینلزاں بائیکاٹ کتگ اَت بلئے دومی نیم ءَ یک ٹینس کھلاڑی یے آروس گوں کرکٹ کھلاڑی بوتگ اَت ءُُ درائیں ہلک ءَ ناچ ءُُ ثبت پیش داشتگ ۔ چرے ترمیم ءِ منظوری ءَ رند مزن وزیر ءَ را باز جیڑگ دیم ءَ اتکگ اَت پرچکہ چریشی ءَ درائیں ایجنڈہ ءِ سرا تران نہ بیت ءُُ یک ءُُ کپے منگے ءِ چارگ ءَ رند اجلاس ہلاس کنگ بوتاں ،پمشکا اے بہتام کہ کسانیں دمگ ایشانی سرا بستگ اَنت یک حدے ءَ راست اَنت کہ پنجاب ءِ حکومت ایوک ءَ پنجاب ءِ حد ءُُ ابیلاں چہ برجم اِنت ءُُ چریشی ءَ دیم آ نئیت انت پمشکا ہرچی دیمروئی ءِ کار بوہگ ءَ اِنت آ ایوک ءَ پنجاب ءَ بوہگ ءَ اَنت ءُُ اے دگہ دمگ چہ ایشی ءَ زبہر اَنت ۔سیلاب زدگیں مردمانی بابت ءَ درائیں منصوبہاں مالی کمک ءَ وفاق ءَ انکار کتگ ءُُ گشتگ کہ ایشاں ایوک ءَ نیم رقم دئیگ بہ بیت بلئے وت مزن وزیر ءَ ٹیکسٹائل فامیا ءِ کمک ءَ ۱۸۰ ارب کلدار ءِ جار جتگ ات۔چر ے زراں وفاق ءِ مستریں دمگ بلوچستان یک کلدارے اوں دئیگ نہ بوتگ ۔ وہدیکہ اے دمگی وزیراں ایشانی ھلاپ ءَ تران کت داں ایشانی بابت ءَ مزن وزیر ءَ وتی گوش ٹال کت ءُُ وت جلسہ ءَ تران کنگ ءَ درشت ۔ہمے مجلس ءَ یکجائیں کونسل کمیٹی ءِ جیڑگاں چہ بے سروکی ءُُ وتی دل ءِ تاہیری ءَ آئی ءَ جلسہ ءَ تران کتگ ءُُ مردمانی دیم ءَ ہروڑیں بٹاک بندی کتگ۔
