لاہور: وزیراعظم آزاد کشمیر راجہ فاروق حیدر نے کہا ہے کہ اگر وزیراعظم ہی غدار ہے تو پھر ملک کا اللہ ہی حافظ ہے۔

لاہور میں میڈیا سے گفتگو کرتے ہوئے وزیراعظم آزاد کشمیر راجہ فاروق حیدر نے کہا کہ آج دو سابق وزرائے اعظم کو غداری کیس میں عدالت بلوایا گیا، اگر وزیراعظم ہی غدار ہے تو پھر ملک کا اللہ ہی حافظ ہے، پاکستان میں سیاسی قیادت پر غداری کا الزام لگانا مذاق بنا دیا گیا ہے۔

واضح رہے کہ سابق وزرائے اعظم اور مسلم لیگ (ن) کے رہنما نواز شریف، شاہد خاقان عباسی اور صحافی سرل المیڈا بغاوت کیس میں ہائیکورٹ کے روبرو پیش ہوئے۔ ہائی کورٹ نے تینوں افراد کو تحریری جواب جمع کرانے کا حکم دیتے ہوئے اٹارنی جنرل کو نوٹس جاری کردیے ہیں۔