کوئٹہ: بلوچستان کے ضلع سکندرآباد(سوراب) میں ٹریفک حادثے میں باپ بیٹے سمیت تین افراد جاں بحق اور ایک زخمی ہوگیا۔ تفصیلات کے مطابق کوئٹہ سے کراچی جانے والا مزدا ٹرک آر سی ڈی شاہراہ پر سکندرآباد کے علاقے حاجیکہ کے مقام پر سڑک پر کھڑے ٹرالر سے ٹریلر سے ٹکرا گیا۔ 

حادثے میں حاجی صاحب جان کاکڑ عرف طور خان اور اس کا جوانسال بیٹا نجیب اللہ کاکڑ موقع پر ہی جاں بحق جبکہ کلیم اللہ اور گلداد زخمی ہوگئے۔ لاشوں اور زخمیوں کو ہسپتال پہنچایا گیا جہاں گلداد بھی دم توڑ گیا۔ جاں بحق ہونیوالے باپ بیٹے کا تعلق قلعہ عبداللہ کے علاقے میزئی اڈہ سے بتایا جاتا ہے۔