باز مردم سے چیزاں یکیں سرپد بیت بلئے راستی ءَ چش نہ اِنت اے سے ایں چیزانی نیام ءَ زمین ءُُ آزمان ءِ اگاں پرک ءُُ جتائی یے نیست اِنت بلئے ہنچوہم نزیک نہ اَنت کہ ایشاناں یک گشگ بہ بیت۔

اگاں شرک ءِ گپ بہ بیت داں شرک ہما باوری ءَ گش اَنت کہ یک نہ دیستیں ترسے ءِ پداں آئی ءَ چہ رکینگ ءِ پدا ءَ بنی آدم وڑ وڑیں کار کنت ہما درائیں چست ءُُ ایر شرک ءُُ پال گشگ بہ بنت چوکہ بدیں چماں چہ رکگ ءِ شرک،جن ءُُ جنساں چہ رکگ ءِ شرک ، زہگانی چہ پریاں رکینگ۔

ءِ شر ءُُ اے دگہ شرکانی یک دگہ چیزے ہم ردیں حیالے کہ ایشی ءَ گوں مدام مذہبے ءَ بندوک کن اَنت کہ اے سرجم ءَ رد اِنت شرکاں گوں نیکراہ ءُُ مذہباں ہچی سیادی نیست اَنت پرچکہ اے وت چہ مذہب ءُُ نیکراہ ءَ ساری ءِ چیزاں بلکیں نیکراہ ءُُ مذہب ایشی ءَ گناہ یے لیک اَنت بزاں ہما مردم کہ آئی ءَ را شرک ءُُ پالانی سرا باوری آ چہ نیکراہ ءَ در کنگ بیت ۔

پرچکہ شرک ءُُ پالانی باوری گوں ہما نہ دیستیں ترسے ءَ گوں بندوک اَنت ءُُ پال ہما آوکیں وہدے ءِ بابت ءَ پیش بندی اِنت کہ آوکیں وہد ءَ چے ءُُ چون بیت کنت انچو کہ بلوچ قوم ءَ انگت ءَ بڑدست ءِ چارگ ءِ رواج است انت کہ آوکیں وہد ءِ بابت ءَ چریشی ءَ کمک گرگ بیت۔

دومی ہما کہ ستک اَنت آ یک مردمے ءِ بوت کنت اَنت قومے ءِ نہ اَنت ستک ءُُ باوری ہم چوں شرک ءِ وڑیں چیزے بلئے آ سرجمیں قومے نہ اَنت چوکہ شرک یک سرجمیں قومے ءِ بیت ءُُ بازبراں سرجمیں دنیا ءَ یک وڑیں شرک بوت کنت بلئے ستک ءُُ باور یک نہ اَنت آ یک مردمے ءِ وتی جند ءِ حیالءُُ پگرے بیت اگاں آ چو بہ کنت داں الم ءَ آئی گوما چش بیت ءُُ اگاں آئی چش نہ کت داں چوش ءُُ چوش بیت ۔

بازیں مردم ءِ ہمے ستک اِنت اگاں آئی ءَ را پشت ءَ چہ گوانک جنگ بہ بیت داں آئی ءِ کار حراب بیت اے یک عالمی شرکے بلئے یک مردمے بگش اِنت کہ منا ءَ اگاں کسے ءَ بیگاہ ءِ وہد ءَ پشت ءَ کوانگ جت یا کارے بست آ کار الم ءَ حراب بیت اے یک ستک ءُُ باوری یے کہ ایوک ءَ ہما مردم ءِ جند ءَ گوں بندوک اِنت ایشی ءَ گوں دومی چیز ءَ کار نیست اِنت ۔پمشکا ستک ءُُ باوری دگہ یک چیزے ءُُ شرکءُُ پال دگہ بلئے باز ناسرپدایشاں یکے کنت کہ ردی چیزے زانگ بیت ۔

ستک ایوک ءَ ہما مردم ءِ جند ءَ گوں بندوک اِنت ءُُ شرک ءُُ پال سرجمیں قومے ءَ گوں بندوک اِنت کہ آئی تہا باز براں جہانی شرک ءُُ پال ہم ہوار بنت کہ سرجمیں دنیا ءَ یک بنت بلئے ستک ءُُ باوری چش نہ اَنت بزاں ہمک مردم ءِ وتی جند ءِ لہتیں حاصیں روچانی یا حرکتانی ستک ءُُ باوری بنت کہ دومی قوم یاکہ مردم ءَ را نہ بیت۔سیمی ہمے کہ ایشی ءِ نام میتھ(myth) انت ایشی ءَ را گوں شرکاں کار نیست اِنت ۔

اے ہما بے باوریں حیال اِنت کہ اصل ءَ چوش نہا چوکہ مردمانی بال کنگ ،یاکہ یک مردمے ءِ بیست ءُُ دست ءُُ بیست پادانی بوہگ انچومیتھ اِنت کہ ایشانی گوں راستی ءَ سیادی یے نیست اِنت ۔انچوکہ پیش ءِ وہد ءَ گشگ بوتگ کہ فلاں مردم ءَ بال کتگ ءُُ فلان جنِ ءِ ہشاد چم بوتگ اَنت کہ شے کہیر ی ہم بلوچانی یک میتھ یے کہ آئی ءَ کہیر ءِ درچکانی سرا بوتگ ءُُ بالے کتگ بزاں ہما گپ کہ سائنس ءُُ لوجک ءِ حساب ءَ بوت نہ بیت۔

ما چوش ایشی ءَ بہگشاں انگت ءَ گہتر بیت کہ میتھ بزاں ہما بے باوریں گپ اَنت یاکہ چیزاں کہ آوانی گوں راستی ءَ سیادی نیست اِنت ءُُ ایشانی است بوہگ ءِ ہچ گواہ نیست اَنت انگت ءَ بنی آدم ءِ ایوک ءَ یک سرے بوتگ بلئے ہندوانی گورا دہ سری راوان ہم است انت کہ آوانی میتھ اِنت۔