کیلیفورنیا: لاس اینجلس کے نزدیک معروف کھیل بولنگ کھیلنے کی جگہ پر فائرنگ سے 3 افراد ہلاک اور 4 زخمی ہوگئے ہیں۔

بین الاقوامی خبر رساں ادارے کے مطابق لاس اینجلس کے گیمنگ زون میں مشہور کھیل بولنگ میں مصروف کھلاڑیوں پر فائرنگ سے 3 افراد ہلاک ہوگئے جب کہ 4  زخمی ہوگئے۔

ریسکیو ادارے نے امدادی کاموں کا آغاز کرتے ہوئے ہلاک اور زخمی ہونے والوں کو قریبی اسپتال منتقل کیا جہاں زخمیوں کو طبی امداد فراہم کی جارہی ہے۔ 2 زخمیوں کی حالت نازک بتائی جارہی ہے۔

پولیس نے گیبل ہاؤس باؤل میں فائرنگ والے علاقے سے لوگوں کو دور رہنے کی ہدایت کرتے ہوئے میڈیا کو بتایا کہ جائے وقوعہ کا گھیراؤ کرکے امدادی کاموں کا آغاز کردیا گیا ہے۔

فائرنگ کرنے کی وجہ اور ملزم سے متعلق کوئی اطلاع فراہم نہیں کی گئی ہے۔ پولیس کا کہنا ہے کہ تحقیقات جاری ہیں اور تفتیش مکمل ہونے پر حادثے کی وجوہات کا تعین کیا جا سکے گا۔