تربت: کلاتک میں فائرنگ سے خاتون جاں بحق، لیویزفورس کی بروقت کاروائی، تین ملزمان کو گرفتار کرلیا۔ گزشتہ شب تربت کے نواحی علاقے کلاتک میں خاتون کو فائرنگ کر کے قتل کردیا گیا، قتل کی اطلاع ملتے ہی ڈپٹی کمشنر کیچ میجر ریٹائرڈ محمد الیاس کبزئی کی سربراہی میں لیویز فورس جائے وقوعہ پر پہنچی اورخاتوں کی لاش کو سول ہسپتال تربت میں پوسٹ مارٹم کرنے کے بعد ورثاء کے حوالے کردیا۔
پوسٹ مارٹم رپورٹ کے مطابق خاتون کو دو گولیاں ماری گئیں، مقتولہ کے رشتہ داروں کی نشاندہی پر لیویز فورس نے ڈپٹی کمشنر کیچ،اے سی تربت اورتحصیلدار تربت کی سربراہی میں رات گئے تک کلاتک کے مختلف علاقوں میں ملزمان کی گرفتاری کیلئے چھاپے مارے اور تین ملزمان کو گرفتار کرلیا اور ان سے آلہ قتل پستول بھی برآمد کرلیا۔ لیویز کے مطابق اس سلسلے میں مزید تفتیش جاری ہے۔