کوئٹہ: بلوچستان کے سیکرٹری ہائر ایجوکیشن ہاشم خان غلزئی نے کہا ہے کہ حکومت تعلیم کے فروغ کے لئے بھرپور اقدامات اٹھا رہی ہے سردار حسن موسیٰ گرلز کالج کی بچیوں نے تین روزہ نمائش کے دوران مختلف شعبوں کے ماڈل بنا کر اپنی صلاحیتوں کو اجاگر کیا ہے مذکورہ کالج میں تعلیمی سرگرمیوں کے ساتھ ساتھ غیر نصابی سرگرمیاں بھی جاری ہین جس سے بلوچستان کی نوجوان نسل اور طالبات میں ان کی صلاحیتوں کو بروئے کار لانے کا موقع پر مل رہا ہے۔

ان خیالات کا اظہار انہوں نے جمعرات کو کالج میں منعقدہ نمائش کے دورے کے موقع پر منعقدہ تقریب اور میڈیا سے گفتگو کے دوران کیا اس موقع پر ڈائریکٹر کالجز ربابہ حمید درانی اور کالج کی پرنسپل میڈیم سعدیہ فاروقی سمیت دیگر بھی موجود تھے ہاشم خان غلزئی نے کہا کہ بلوچستان میں ٹیلنٹ کی کوئی کمی نہیں صوبے کے طلباء اور طالبات نے ہمیشہ ہر محاز پر اپنی صلاحیتوں کا لوہا منوایا ہے۔

کالج میں آ کر مجھے بڑی خوشی ہوئی ہے کہ یہاں پر تعلیمی سرگرمیوں کے ساتھ ساتھ غیر نصابی سرگرمیاں بھی جاری ہیں اور طالبات نے اپنی اساتذہ کے ساتھ مل کر تمام مضامین کے حوالے سے ماڈل بنا کر حیران کر دیا ہے یہ خوش آئند بات ہے کہ ہماری بچیاں تعلیم کے حصول کے ساتھ ساتھ مختلف مضامین کے بارے میں ماڈل بنانے میں بھی مہارت رکھتی ہیں اور ان ماڈل کی روشنی میں ہم مختلف شعبوں میں ریسرچ کرکے مزید اقدامات اٹھا سکتے ہیں۔

انہوں نے کہا کہ بلوچستان کے طلباء و طالبات نے تعلیم کے حصول سمیت غیر نصابی سرگرمیوں میں بھی بڑھ چڑھ کر حصہ لے کر اپنی صلاحیتوں کا لوہا منوایا ہے یہ خوش آئند بات ہے اس طرح کے پروگرام آئندہ بھی جاری رہنے چاہیں اس موقع پر کالج کی پرنسپل سعدیہ فاروقی نے کہا کہ ہماری طالبات نے اپنی اساتذہ کے ساتھ مل کر سائنس اور آرٹس کے مضامین کے حوالے سے مختلف ماڈل تیار کرکے 3 روزہ نمائش میں حصہ لیا ہے۔

اور 6 مختلف کالجز کی بچیاں بھی اس میں حصہ لے رہی ہیں ہماری کوشش ہے کہ تعلیم کے فروغ سمیت طالبات کو غیر نصابی سرگرمیوں کے مواقع فراہم کئے جائیں تاکہ وہ اپنی صلاحیتوں کو بروئے کار لا سکیں۔

انہوں نے کہا کہ ان ماڈلز بنانے والی طالبات حمیرا بی بی، درخشان، رقیہ، رضیہ، حنیفہ، سحرش،ساجدہ،علیزے،شاہدہ بی بی،عاصمہ بتول،لطیفہ،مقدسہ،سعیدہ فاطمہ، منائل، بی بی ثانیہ سمیت اساتذہ افشاں، مس ملائکہ غفار،عابدہ ریاض،مس شمائل اور نفیسہ سمیت دیگر نے بھی اس نمائش میں طالبات کی بھرپور معاونت کی ہے اور ان طالبات نے اپنی صلاحیتوں کا لوہا منواتے ہوئے انعام حاصل کئے ہیں۔