بیجنگ: چین کا سیاحتی شہر لیجیانگ 5.4 شدت کے زلزلے کے جھٹکوں سے لرز اُٹھا جس کے باعث 22 افراد زخمی ہوگئے۔ 

عالمی خبر رساں ادارے کے مطابق چین کے جنوب مغربی شہر لیجیانگ میں 5.3 شدت کے زلزلے جھٹکے محسوس کیے گئے جس کے نتیجے میں چند مکانات گر گئے اور سڑکوں پر گڑھے پڑ گئے۔

یو ایس جیولوجیکل سروے کے مطابق زلزلہ چین کے صوبوں یونن اور سیچوان کی درمیانی سرحد کے قریب آیا تھا زلزلے کا مرکز لیجیانگ سے 115 کلومیٹر دور تھا۔ زلزلے کی شدت 5.4 اور گہرائی 38 کلومیٹر تھی۔

چین کے صوبے یونن کے ننگ لانگ کاؤنٹی میں زلزلے سے 22 افراد زخمی ہوئے، جن میں سے دو شدید زخمی ہوئے۔ زلزلے کے مرکز کی طرف سرچ اینڈ ریسکیو ٹیم کے 60 ارکان کو روانہ کر دیا گیا ہے۔

گزشتہ برس ستمبر میں صوبے سیچوان میں آنے والوں زلزلے میں 3 افراد ہلاک اور درجنوں زخمی ہوئے گئے تھے جب کہ 2008 میں بھی سیچوان صوبے میں 7.9 شدت کے زلزلے میں ہزاروں بچوں سمیت 80 ہزار سے زائد افراد ہلاک ہوئے تھے۔