پاکستان کے دورہ سری لنکا کے دوران طے شدہ 3 ایک روزہ بین الاقوامی (او ڈی آئی) میچز پر مشتمل ون ڈے سیریز کو ختم کردیا گیا ہے۔
شیڈول کے مطابق پاکستان کرکٹ ٹیم کو جولائی میں اپنے دورہ سری لنکا کے دوران دو ٹیسٹ اور تین ون ڈے میچز کھیلنا تھے۔
تاہم، پاکستان کرکٹ بورڈ (پی سی بی) کے ترجمان نے ڈان ڈاٹ کام سے گفتگو کرتے ہوئے تصدیق کی ہے کہ سری لنکا کرکٹ (ایس ایل سی) کی درخواست پر ون ڈے میچوں کی سیریز کو ختم کر دیا گیا۔
ترجمان پی سی بی نے مزید بتایا کہ سری لنکا کرکٹ نے لنکا پریمیئر لیگ (ایل پی ایل) جلد شروع کرنے کے لیے بورڈ سے تین ون ڈے میچز کی سیریز ڈراپ کرنے کی درخواست کی تھی۔
پی سی بی کے عہدیدار نے بتایا کہ پاکستان اور سری لنکا کے درمیان یہ سیریز آئی سی سی مینز کرکٹ ورلڈ کپ سپر لیگ کا حصہ نہیں تھی جبکہ ایس ایل سی کو مالی چیلنجز کا سامنا ہے اس لیے پی سی بی نے لنکن بورڈ کی درخواست قبول کر لی۔
انہوں نے مزید کہا کہ دو ممالک کے درمیان ٹیسٹ میچوں کی سیزیر کے انعقاد کے لیے شیڈول کے مطابق کام جاری ہے اور ٹیسٹ سیریز طے شدہ شیڈول کے مطابق 5 جولائی سے 9 اگست کے درمیان کھیلے جائے گی۔
یہ خبر ایسے وقت میں سامنے آئی ہے جبکہ سری لنکا ان دنوں بد ترین معاشی بحران کا شکار ہے، مہینوں سے جاری بلیک آؤٹ، خوراک، ایندھن اور ادویات کی شدید قلت نے پورے جنوبی ایشیائی جزیرے میں بہت بڑے پیمانے پر مسائل و مشکلات کو جنم دیا ہے اور ملک اپنی تاریخ کی اب تک کی بدترین معاشی بدحالی کا شکار ہے۔