کوئٹہ: کوئٹہ،سبی،قلات ،تربت اور گوادر میں دستی بم حملوں، فائرنگ سے دو لیویز اہلکار زخمی ہوگئے، گوادر میں نامعلوم افراد نے پولیس اہلکاروں سے اسلحہ چھین کرگاڑیوں اور موٹر سائیکلوں کو آگ لگادی ،
اتوار کے روز کوئٹہ کے علاقے قمبرانی روڈ پر نامعلوم افراد نے کیچی بیگ پولیس تھانے کی دیوار کیساتھ بم نصب کر رکھا تھا جو زوردار دھماکے سے پھٹ گیا
تاہم کوئی جانی نقصان نہیں ہوا،سبی کے علاقے ترین چوک پر نامعلوم افراد نے پولیس اہلکاروں پردستی بم پھینکا جو زوردار دھماکے سے پھٹ گیا تاہم کوئی جانی نقصان نہیں ہوا،
اتوار کی شب قلات کے علاقے مہلبی میں نامعلوم افراد نے لیویز اہلکاروں پر فائرنگ کردی جس کے نتیجے میں دواہلکارزخمی ہوگئے لیویز کی جوابی کارروائی کے بعد ملزمان فرار ہوگئے، لیویز نے زخمی اہلکاروں کو ہسپتال منتقل کرکے علاقے کو گھیرے میں لیکر ملزمان کی تلاش شروع کردی،
تربت میں نامعلوم موٹر سائیکل سواروں نے نادرا آفس کے نزدیک قائم سیکورٹی فورسز کی چیک پوسٹ پر دستی بم پھینکا جو زوردار دھماکہ سے پھٹ گیا،
گوادر کے علا قے جیونی میں سنٹسر کے مقام پر نامعلوم افراد نے پو لیس اہلکاروں پر حملہ کر کے ان سے اسلحہ چھین کر 3گاڑیوں 5مو ٹرسائیکلوں کو آگ لگا دی جبکہ ایس ایچ او کے دفتر پر دستی بم پھینک کر فرار ہو گئے ، پو لیس نے جائے وقوعہ کو گھیرے میں لینے کے بعد شواہد اکھٹے کر کے ملزمان کی تلاش شروع کر دی ۔