کوئٹہ: وزیراعلیٰ بلوچستان میر سرفراز بگٹی نے آج گورنمنٹ گرلز پوسٹ گریجویٹ ڈگری کالج میں منعقدہ تقریب میں شرکت کی، جہاں انہوں نے 50 طالبات کو قرعہ اندازی کے ذریعے پنک اسکوٹیز تقسیم کیں۔ اس موقع پر انہوں نے “جامع پنک اسکوٹی اسکیم” متعارف کرانے کا اعلان کیا اور کہا کہ بلوچستان کی ہر باصلاحیت اور پوزیشن ہولڈر طالبہ کو اس اسکیم کے ذریعے سہولت فراہم کی جائے گی۔

خواتین کو بااختیار بنانا ہماری ترجیح
وزیراعلیٰ بلوچستان نے اپنے خطاب میں کہا، “ہم بلوچستان میں خواتین کو بااختیار دیکھنا چاہتے ہیں۔ یہ اسکیم اس جانب ایک اہم قدم ہے۔ ہمارے صوبے میں 5 خواتین ڈپٹی کمشنرز، 30 مرد ڈپٹی کمشنرز سے بہتر کارکردگی دکھا رہی ہیں۔”

سازشوں کے خلاف نوجوانوں کو متحد ہونے کی اپیل
وزیراعلیٰ نے مختلف سازشوں کی نشاندہی کرتے ہوئے کہا کہ پاکستان کے خلاف منظم پروپیگنڈے کیے جا رہے ہیں، اور غیر متوازن ترقی کے ذریعے نوجوانوں کی ذہن سازی کی جا رہی ہے۔ انہوں نے کہا، “آرٹیفیشل انٹیلیجنس کے ذریعے نوجوانوں کو گمراہ کرنے کی کوشش کی جا رہی ہے، لیکن میں نوجوانوں سے اپیل کرتا ہوں کہ وہ جھوٹے پروپیگنڈوں کو مسترد کریں اور اپنے سوشل میڈیا پلیٹ فارمز کے ذریعے مثبت اقدامات کریں۔”

کرپشن کے خاتمے کا عزم
وزیراعلیٰ نے کرپشن کے خاتمے کے حوالے سے کہا، “اسمبلی کے پہلے روز وعدہ کیا تھا کہ کوئی نوکری نہیں بکے گی، اور الحمدللہ ہم اس وعدے کی تکمیل کر رہے ہیں۔ پشین میں میرٹ کے باعث ایک سویپر کی بیٹی کو سرکاری ملازمت ملی۔ ہم پورے صوبے میں میرٹ کو یقینی بنانے کے لیے پرعزم ہیں۔”

نوجوانوں کے لیے ترقی کے مواقع
انہوں نے نوجوانوں کے کردار پر زور دیتے ہوئے کہا، “بلوچستان کے نوجوان باصلاحیت ہیں، لیکن مواقع کی کمی ہے۔ ہم ان کے لیے ترقی کے مواقع فراہم کریں گے اور ان کی ریاست سے دوری ختم کریں گے۔ کرپشن کے خلاف اقدامات میں نوجوانوں کو میرا ساتھ دینا ہوگا۔”

دہشت گردی کے خلاف مضبوط موقف
وزیراعلیٰ نے دہشت گردی کے خلاف اپنے عزم کا اعادہ کرتے ہوئے کہا کہ مستونگ، ہزارہ کمیونٹی، اور بہادر خان ویمن یونیورسٹی کے معصوم طالب علموں کا خون رائیگاں نہیں جائے گا۔ “ہم نوجوانوں کی مدد سے دہشت گردی کا مقابلہ کریں گے اور اپنے تعلیمی اداروں کو ویران نہیں ہونے دیں گے۔”

تقریب کا اختتام طالبات کے لیے نئی امیدوں اور بہتر مستقبل کے عزم کے ساتھ ہوا۔