کوئٹہ:نیشنل کے سربراہ ڈاکٹر عبدالمالک بلوچ نے کہا ہے کہ سیاست میں مداخلت کو بھرپور جمہوری مزاحمت سے روکا جاسکتا ہے جمہوری مزاحمت میں چھوٹی سیاسی جماعتوں نے ہراول دستے کا کردار ادا کیا ہے

سیاسی تاریخ میں بڑے سیاسی جماعتوں کے غیر جمہوری کردار نے ہی حقیقی معنوں میں جمہوریت اور پارلیمنٹ کی بالادستی کو کمزور کیا جب بھی سیاسی جماعتوں کو موقع ملتا ہے تو اقتدار کو نظریات پر ترجیح دیتی ہیں۔ان خیالات کا اظہار انہوں نے پارٹی کی مرکزی کمیٹی کے اختتامی سیشن کے موقع پر شرکاء سے خطاب کرتے ہوئے کیا۔

اس موقع پر مرکزی کمیٹی کے اجلاس سے مرکزی سیکرٹری جنرل میر کبیر احمد محمد شہی مرکزی سینئر صدر شاوس حاصل بزنجو ڈاکٹر اسحاق بلوچ ایوب ملک رمضان میمن صدیق کھیتران ایڈووکیٹ چنگیز حئی بلوچ ،میران بلوچ ،ڈاکٹر سرفراز خان ،حاجی عبد الصمد بلوچ ،ڈاکٹر رمضان ہزارہ ،ایوب قریشی اور مختیار بلوچ نے بھی خطاب کیا۔ڈاکٹر عبدالمالک بلوچ نے کہا کہ سی پیک بلوچستان میں نہیں ہے گوادر ایئرپورٹ کے فوائد بھی نہ بلوچستان اور نہ گودار کو ملیں گے ریاست اپنی منفی پالیسی کے بدولت بلوچستان کی حق حاکمیت و اختیار پر قابض ہے۔

سیندک سے لیکر ریکوڈک تک تمام معاہدوں کو خفیہ رکھا گیا۔جو خود عوام کے ساتھ دھوکہ کی سنگین شکل ہے۔نیشنل پارٹی کے مرکزی صدر نے کہا کہ نیشنل پارٹی نے بلوچستان کے مسائل و معاملات پر اور عوام کے حق رائے دہی پر بھرپور مزاحمت کی ہے۔نیشنل پارٹی بلوچستان میں کسی بھی ماورائے آئین اقدام کو تسلیم نہیں کریگی۔انہوں نے کہا کہ افسوس ہے کہ جمہوریت کے علمبردار دونوں بڑی جماعتوں نے سمجھوتا کرلیا ہے اور وہ عوام کی آواز کو دبانے میں مقتدرہ کی حمایتی بن گئے ہیں۔پیکا ایکٹ جیسے کالے قانون کی پارلیمنٹ سے منظوری خود پارلیمنٹ کی خود مختاری پر سوال ہے۔

انہوں نے کہا کہ بلوچستان میں حالات انتہائی مخدوش ہے عوام کی معاشی حالت بہت خراب ہوچکی ہے۔روزگار کے زرائع پر بھی مقتدرہ قابض ہے۔اور مقتدرہ نے بلوچستان کے حالات کو بگاڑا تاکہ بلیک اکانومی حاصل کرسکے۔ڈاکٹر عبدالمالک بلوچ نے کہا کہ نیشنل پارٹی سیاسی کارکنوں کی جماعت ہے اور سیاسی کارکن کو کامریڈ ہونا چاہیے اگر سیاسی کارکن سے کامریڈ شپ اور کردار چلی گء تو تب سیاست ختم ہو جائے گی۔انہوں نے کہا کہ اپنے اکابرین پر تحقیق کرنے سے آپ کو معلوم ہو جائے گا کہ کرادر کتنی اہمیت رکھتا ہے۔اکابرین کی نقش قدم پر چلنے سی ہی چیلنجز کا مقابلہ کیا جاسکتا ہے۔