کوئٹہ: بلوچستان حکومت کے ترجمان شاہد رند نے بلوچستان نیشنل پارٹی (بی این پی) کے احتجاج پر ردعمل دیتے ہوئے کہا ہے کہ احتجاج کرنا ہر سیاسی جماعت کا آئینی اور قانونی حق ہے، لیکن قومی شاہراہوں پر اس وقت دفعہ 144 نافذ ہے، جس کے تحت اجتماعات پر پابندی عائد ہے۔

شاہد رند نے کہا کہ بی این پی مینگل کو احتجاج کرنے سے پہلے متعلقہ انتظامیہ سے اجازت طلب کرنی چاہیے۔ انہوں نے مزید کہا کہ بی این پی مینگل کی ہڑتال کی کال پر عوام کا ردعمل سب کے سامنے ہے اور یہ ایک واضح پیغام ہے۔

ترجمان بلوچستان حکومت نے خواتین خودکش حملہ آوروں کے معاملے پر بھی سخت موقف اپنایا اور سوال اٹھایا کہ ایسے واقعات پر عزت و غیرت کے تقاضے کیوں خاموش ہوجاتے ہیں؟ انہوں نے کہا کہ جب ریاست مخالف عناصر کے خلاف کارروائی کی جاتی ہے تو بعض لوگ عزت و غیرت کے نام پر مفاداتی ایجنڈے کو ہوا دینے کی کوشش کرتے ہیں۔

ریاستی رٹ پر کوئی سمجھوتہ نہیں ہوگا

شاہد رند نے واضح کیا کہ شدت پسندی کی کسی بھی قسم کی حوصلہ افزائی قابل قبول نہیں اور ریاست اپنی رٹ پر کوئی سمجھوتہ نہیں کرے گی۔ انہوں نے کہا کہ جو عناصر خواتین کو ڈھال بنا کر ریاست کو چیلنج کر رہے ہیں، انہیں جواب دینا ہوگا۔

ترجمان بلوچستان حکومت نے مزید کہا کہ قانون شکنی کرنے والے عناصر کے خلاف بلا تفریق کارروائی کی جائے گی، کیونکہ ریاست ہر فرد کی عزت نفس کی یکساں طور پر محافظ ہے۔

یہ بیانات ایسے وقت میں سامنے آئے ہیں جب بلوچستان نیشنل پارٹی کی جانب سے احتجاج اور ہڑتال کی کال دی گئی ہے، جس پر حکومت اور عوام کا ملا جلا ردعمل سامنے آ رہا ہے