کوئٹہ: مستونگ لک پاس کے قریب ایک خودکش دھماکہ ہوا ہے، جس کے بعد بلوچستان حکومت نے صورتحال پر ردعمل دیا ہے۔

ترجمان بلوچستان حکومت شاہد رند  کے مطابق، دھماکہ اس مقام کے نزدیک ہوا جہاں بلوچستان نیشنل پارٹی (بی این پی) کا دھرنا جاری تھا۔ ابتدائی اطلاعات کے مطابق، اس واقعے میں کوئی جانی نقصان نہیں ہوا، اور دھرنے میں شامل شرکاء، بشمول سردار اختر مینگل اور دیگر سیاسی قیادت، محفوظ ہیں۔

ترجمان حکومت بلوچستان  نے بتایا کہ وہ گزشتہ رات سے بی این پی کی قیادت کے ساتھ رابطے میں ہے۔ بی این پی مینگل کے ایک وفد کی انتظامیہ سے گزشتہ رات ملاقات ہوئی تھی، جس کے بعد آج حکومتی وفد کے سردار اختر مینگل سے ملاقات پر اتفاق ہوا ہے۔

بلوچستان حکومت نے واقعے کی مکمل چھان بین کا اعلان کیا ہے اور کہا ہے کہ انکوائری کے نتائج جلد عوام کے سامنے لائے جائیں گے۔ ترجمان نے زور دے کر کہا کہ دھرنے کے شرکاء، بشمول سردار اختر مینگل اور دیگر قیادت، کی حفاظت حکومت کی ذمہ داری ہے۔

انہوں نے سردار اختر مینگل، بی این پی اور عوام سے اپیل کی کہ وہ حکومت کے ساتھ تعاون کریں اور بات چیت کے ذریعے صورتحال کو بہتر بنانے میں مدد فراہم کریں۔

حکومت نے امن و امان کو یقینی بنانے کے لیے تمام ضروری اقدامات کرنے کا عزم ظاہر کیا ہے۔