کوئٹہ: صوبائی مشیر برائے کھیل و امورِ نوجوانان محترمہ مینا مجید بلوچ نے کہا ہے کہ وطن عزیز پاکستان کی جانب سے شروع کیے گئے آپریشن بنیان مرصوص کا آغاز درحقیقت پاکستانی عوام کے دل کی آواز اور ایک دیرینہ قومی خواہش کی تکمیل ہے۔

دشمن کی جانب سے شب خون مارنے کی بزدلانہ کوشش نہ صرف بین الاقوامی قوانین کی صریح خلاف ورزی تھی بلکہ اس نے خطے کے امن کو داؤ پر لگا دیا۔

لیکن تاریخ گواہ ہے کہ جب بھی ہمارے قومی وقار، سلامتی اور خودمختاری کو للکارا گیا، پاکستان کی افواج نے جرات و بہادری کی نئی مثالیں قائم کیں۔

اپنے جاری بیاں میں انکا کہنا تھا کہ آپریشن بنیان مرصوص نہ صرف ایک عسکری کارروائی ہے بلکہ یہ پاکستان کے پُرامن عزائم اور مضبوط دفاع کا مظہر بھی ہے۔

دشمن کو یہ پیغام دینا ناگزیر تھا کہ ہم امن چاہتے ہیں، لیکن اگر ہمارے امن کو کمزوری سمجھا گیا تو ہم بھرپور جواب دینے کی بھرپور صلاحیت رکھتے ہیں۔

بھارتی جارحیت کا منہ توڑ جواب دے کر پاک افواج نے یہ واضح کر دیا ہے کہ پاکستان کی سرزمین پر میلی نظر ڈالنے والا ہر قدم پچھتائے گا۔

ان کا مزید کہنا تھا کہ پاکستانی افواج نے دشمن کی اہم تنصیبات پر کامیاب حملے کر کے نہ صرف دشمن کے ناپاک عزائم خاک میں ملا دیے بلکہ پوری قوم کا سر فخر سے بلند کر دیا۔ یہ آپریشن اس بات کی دلیل ہے کہ پاکستان کا دفاع ناقابل تسخیر ہے،

اور پوری قوم، بالخصوص ہماری نوجوان نسل، اپنی افواج کے شانہ بشانہ کھڑی ہے۔ انکا مزید کہنا تھا کہ میں بطور مشیر کھیل و امورِ نوجوانان اس بات پر فخر کرتی ہوں کہ ہماری نوجوان نسل میں حب الوطنی کا جذبہ پوری شدت سے موجود ہے۔

ہمارے نوجوان نہ صرف کھیلوں کے میدان میں بلکہ قوم کے ہر محاذ پر ملک کا نام روشن کرنے کے لیے تیار ہیں۔

آج ہمیں یکجہتی، عزم، اور اتحاد کی پہلے سے کہیں زیادہ ضرورت ہے، اور اللہ کے فضل و کرم سے قوم کے یہ سپوت ہر چیلنج کا سامنا کرنے کے لیے ہمہ وقت تیار ہیں جبکہ میں اپنے دل کی گہرائیوں سے پاک افواج کو خراجِ تحسین پیش کرتی ہوں جنہوں نے ایک بار پھر دنیا کو یہ بتا دیا کہ پاکستان ایک پرامن لیکن غیرت مند اور خودمختار ریاست ہے۔