میونخ ( آزادی نیوز) پیرس سینٹ جرمین (PSG) نے یورپی فٹبال کی تاریخ رقم کرتے ہوئے یوئیفا چیمپئنز لیگ 2025 کا فائنل جیت لیا۔ جرمنی کے شہر میونخ میں الیانز ایرینا میں کھیلے گئے فائنل میں فرانسیسی کلب نے اطالوی کلب انٹر میلان کو صفر کے مقابلے میں پانچ گول سے شکست دے کر پہلی مرتبہ چیمپئنز لیگ ٹرافی اپنے نام کی۔

دلچسپ بات یہ ہے کہ پی ایس جی یہ کارنامہ اس وقت انجام دینے میں کامیاب ہوا جب ٹیم میں لیونل میسی، نیمار اور کیلئان ایمباپے جیسے ستارے موجود نہیں تھے۔ وہ “گولڈن ٹیم” اپنے عروج کے دور میں بھی سیمی فائنل تک رسائی حاصل نہ کر سکی تھی، جب کہ موجودہ ٹیم نے نہ صرف فائنل تک رسائی حاصل کی بلکہ اسے شاندار انداز میں جیت بھی لیا۔

میچ کے دسویں منٹ سے ہی پی ایس جی نے انٹر پر دباؤ ڈالنا شروع کیا۔ بارہویں منٹ میں دیزائر ڈوئے کے عمدہ اسسٹ پر حکیمی نے پہلا گول کیا۔ آٹھ منٹ بعد، خود ڈوئے نے شاندار گول کر کے اسکور 0-2 کر دیا۔ پہلے ہاف کے اختتام تک انٹر مکمل طور پر بے بس دکھائی دیا۔

دوسرے ہاف میں بھی پی ایس جی کا غلبہ جاری رہا۔ 63ویں منٹ میں ڈوئے نے ایک اور گول کر کے اپنی ٹیم کی برتری کو تین گول تک پہنچا دیا۔ اس کے بعد کوارٹسکیلیا نے 73ویں منٹ میں اور متبادل کھلاڑی مایولو نے 87ویں منٹ میں گول کر کے میچ کا اختتام 0-5 کے شاندار اسکور پر کیا۔

پی ایس جی کے 19 سالہ اسٹار دیزائر ڈوئے فائنل کے ہیرو ثابت ہوئے۔ انہوں نے دو گول اسکور کیے اور ایک اسسٹ دیا، جس پر انہیں میچ کا بہترین کھلاڑی قرار دیا گیا۔ سابق انگلش کپتان اسٹیون جیرارڈ نے تبصرہ کرتے ہوئے کہا:
“ڈوئے کا کھیل دیکھ کر لگتا ہی نہیں کہ یہ صرف 19 سال کا کھلاڑی ہے۔ یہ انٹر میلان کے لیے ڈراؤنا خواب ثابت ہوا۔”

انٹر میلان پورے میچ میں بے اثر نظر آیا۔ ان کی دفاعی لائن، جس پر پورے سیزن انحصار کیا گیا، مکمل طور پر ناکام رہی۔ گول کیپر یان سومر کو پانچ بار گیند جال سے نکالنی پڑی، جب کہ حملے کے شعبے میں بھی انٹر کی ٹیم کوئی خاص کارکردگی نہ دکھا سکی۔

میچ کے اختتام پر جب ریفری نے آخری سیٹی بجائی تو پی ایس جی کے کھلاڑی اور عملہ خوشی سے آبدیدہ ہوگئے۔ میدان اور اسٹینڈز میں جشن کا سماں تھا۔ یہ وہ لمحہ تھا جس کا کلب کے شائقین کئی دہائیوں سے انتظار کر رہے تھے۔