میڈرڈ: ریال میڈرڈ کے اندرونی حالات میں ہلچل مچ گئی ہے۔ کلب نے باضابطہ طور پر ہیڈ کوچ ژابی الونسو کی برطرفی کا اعلان کر دیا ہے۔ یہ فیصلہ شائقینِ فٹبال کے لیے غیر متوقع تھا۔ کلب کے اعلامیے میں بتایا گیا کہ یہ فیصلہ باہمی رضامندی سے کیا گیا ہے، ساتھ ہی نئے کوچ کے نام کا بھی اعلان کر دیا گیا ہے۔
کلب کے بیان میں کہا گیا کہ کلب اور کوچ ژابی الونسو کے درمیان باہمی اتفاقِ رائے سے علیحدگی کا فیصلہ کیا گیا ہے۔ وہ ہمیشہ تمام بلانکوس شائقین کی محبت اور عزت کے حقدار رہیں گے کیونکہ وہ ریال میڈرڈ کے ایک لیجنڈ ہیں اور ہمیشہ کلب کی اقدار کی نمائندگی کرتے رہے ہیں۔ ریال میڈرڈ ان کے لیے ہمیشہ گھر رہے گا۔”
بیان میں مزید کہا گیا کہ:
“کلب ژابی الونسو اور ان کے کوچنگ اسٹاف کی محنت اور خدمات پر ان کا شکریہ ادا کرتا ہے اور ان کی آئندہ زندگی کے لیے نیک تمناؤں کا اظہار کرتا ہے۔”
ریال میڈرڈ نے ژابی الونسو کے جانشین کے طور پر آلوارو آربیلوا کی تقرری کی تصدیق کر دی ہے۔ آربیلوا ماضی میں ریال میڈرڈ، لیورپول اور اسپین کی قومی ٹیم میں ژابی الونسو کے ساتھ کھیل چکے ہیں۔
آربیلوا اس سے قبل ریال میڈرڈ کی بی ٹیم (کاستیا) کے کوچ تھے، جہاں ان کی کارکردگی نے کلب انتظامیہ کو متاثر کیا اور انہیں موجودہ صورتحال کو سنبھالنے کے لیے اندرونی حل کے طور پر منتخب کیا گیا۔
کلب کے مطابق“ریال میڈرڈ اعلان کرتا ہے کہ آلوارو آربیلوا پہلے ٹیم کے نئے کوچ ہوں گے۔ وہ جون 2025 سے کاستیا کے کوچ رہے ہیں اور 2020 سے ریال میڈرڈ کے یوتھ سسٹم سے وابستہ ہیں۔”
سابق بائر لیورکوزن کوچ ژابی الونسو کے لیے سیزن کا پہلا نصف ملا جلا رہا۔ لا لیگا میں ریال میڈرڈ اس وقت لیڈر بارسلونا سے 4 پوائنٹس پیچھے ہے، اگرچہ حالیہ پانچ میچز میں سے چار میں کامیابی حاصل کی گئی۔ چیمپئنز لیگ میں بھی ٹیم کا سفر مشکل رہا، جہاں چھ میچز میں چار فتوحات اور دو شکستوں کے ساتھ 12 پوائنٹس حاصل کیے گئے۔
نتائج اور ٹیم کے ماحول کے انتظام پر جاری بحث کے بعد، بالآخر ژابی الونسو اور ریال میڈرڈ نے علیحدہ ہونے کا فیصلہ کیا۔ اب بلانکوس کی توجہ مستقبل پر مرکوز ہے، جبکہ بدھ کے روز کوپا ڈیل رے میں الباسیٹے کے خلاف میچ شیڈول ہے۔