لیون ڈاؤسکی اور تھامس ملر پر مشتمل بایرن میونخ کا اٹیک اب تک ایونٹ میں 16 گول اسکور کر چکا ہے۔ فوٹو رائٹرز
لالیگا میں بھی شاندار کارکردگی دکھانے والی ایٹلیٹکو کی ٹیم کو اس میچ کیلئے دفاعی کھلاڑی ڈیاگو گوڈن کی خدمات حاصل نہیں ہوں گی جس کا مطلب یہ ہوا کہ ایونٹ میں اب تک مجموعی طور ہر 16 گول داغنے والے تھامس ملر اور روبرٹ لیون ڈاؤسکی پر مشتمل بایرن کے اٹیک کو روکنے کا انحصار نوجوان کھلاڑیوں جوز گیمنز اور لوکاس ہرنینڈز پر ہو گا۔ گیمنز نے کہا کہ یہ میچ بارسلونا کے خلاف سے زیادہ مشکل ہو گا، ان کے پاس مختلف طرح کے ہتھیار ہیں لیکن وہ بھی اسی طرح کی فٹبال کھیلتے ہیں، ہمیں امید ہے کہ یہ رات ان کیلئے زیادہ اچھی ثابت نہیں ہو گی اور ہم اچھے نتائج حاصل کرنے میں کامیاب رہیں گے۔ تجربے کی بنیاد پر جرمن چیمپیئن ٹیم کو اپنے ہسپانوی حریف پر واضح برتری حاصل ہے جہاں اس نے لگاتار پانچویں مرتبہ چیمپیئنز لیگ کے سیمی فائنل میں جگہ بنائی ہے تاہم گزشتہ دو سال انہیں بالترتیب ریال میڈرڈ اور بارسلونا کے ہاتھوں شکست کے بعد ٹورنامنٹ سے باہر ہونا پڑا۔ بایرن کی ٹیم اپنے منیجر پیپ گارڈیولا کو جانے سے قبل چیمپیئنز لیگ میں فتح کا تحفہ دینا چاہتی ہے جن کی کوچنگ میں وہ لگاتار تیسرے سال جرمن بنڈس لیگا جیتنے سے محض ایک فتح کے فاصلے پر ہیں۔ بایرن کے گول کیپر مینوئل نوئر نے کہا کہ ہمیں تیار رہنا ہو گا، ، ہم جانتے ہیں کہ ایٹلیٹکو کا کھیل ان سب سے ٹیموں سے کافی مختلف ہے جن کا ہمارا اب تک سامنا ہوا ہے، انہوں نے بارسلونا کو ایونٹ سے باہر کیا اور ہمیں اپنے کوچ سے معلوم ہوا ہے کہ ہمارا سامنا ایک انتہائی خطرناک ٹیم سے ہو گا۔