کراچی: شہر قائد کے مختلف علاقوں میں دوسرے روز بھی تیز ہواؤں کے ساتھ بارش کے باعث موسم خوشگوار ہوگیا ہے۔
کراچی اور اس کے نواحی علاقوں میں دوسرے روز بھی شدید حبس اور گرمی کے بعد بارش کا سلسلہ پھر شروع ہوگیا ہے۔ نیو کراچی، نارتھ کراچی ، گلشن اقبال، گلستان جوہر، کورنگی، ڈیفنس، اولڈ سٹی ایریا، آئی آئی چندریگر روڈ، سائیٹ، ماڑی پور، بلدیہ ٹاؤن اور اورنگی سمیت مختلف علاقوں تیز ہواؤں کے ساتھ وقفے وقفے سے بارش کا سلسلہ جاری ہے۔
سندھ حکومت اور کے ایم سی انتظامیہ کی بے حسی اور مجرمانہ غفلت کے باعث مسلسل دو روز ہونے والی بارش کا پانی سڑکوں پر جمع ہوگیا ہے جس کی وجہ سے کئی علاقوں میں شدید ٹریفک جام کی صورت حال پیدا ہوگئی ہے جب کہ 100 سے زائد گرڈ ٹرپ ہوجانے سے شہر کا بڑا ایک مرتبہ پھر سے بجلی سے محروم ہوگیا ہے۔
محکمہ موسمیات کے مطابق کراچی میں منگل اور بدھ کے دوران اب تک 73 ملی میٹر بارش ریکارڈ کی جاچکی ہے، منگل کے روز 43 اور آج 30 ملکی میٹر بارش ہوئی جب کہ اب بھی مزید بارش کا امکان ہے۔
دوسری جانب ایکسپریس نیوز سے خصوصی بات کرتے ہوئے ڈائریکٹر جنرل محکمہ موسمیات ڈاکٹر غلام رسول نے کہا ہے کہ مون سون کے موسم میں بارشوں کی شدت کے بارے میں صحیح پیش گوئی کرنا مشکل ہوتا ہے، ایک ہی وقت میں ایک ہی سسٹم کے تحت کہیں ہلکی تو کہیں موسلادھار بارشیں معمول کی بات ہے۔ ملک میں مون سون کا باقاعدہ آغاز ہوگیا ہے تاہم ابھی یہ ابتدائی مرحلے میں ہے لیکن اس کے باوجود کراچی سمیت سندھ اور بلوچستان کے ساحلی علاقوں میں عید الفطر سے قبل مزید بارشوں کا امکان ہے تاہم یہ بارشیں شدید نوعیت کی نہیں ہوں گی۔
ڈاکٹر غلام رسول کا کہنا تھا کہ رواں برس کراچی سمیت سندھ اور بلوچستان میں گزشتہ 3 برس کے مقابلے میں زیادہ بارشیں ہوں گی، جولائی کے اوائل اور وسط میں کراچی سمیت ساحلی علاقوں میں موسم ابر آلود رہے گا تاہم جولائی کے آخر اور اگست میں مزید بارشیں ہوں گی۔
