کوئٹہ: کوئٹہ کے علاقے سریاب میں کوئٹہ سے راولپنڈی جانے والی جعفرایکسپریس کو ریلوے پٹڑی پر مشکوک افراد کی موجودگی پر روک لیا گیا۔ پولیس نے ایک مشکوک شخص کو گرفتار کرکے ریلوے پٹڑی کلیئر کرنے کے بعد ٹرین روانہ کردی۔ پولیس کے مطابق سریاب کے علاقے تھانہ خالق شہید بھوسہ منڈی کی حدود میں گوبر میدانی کے قریب جعفر ایکسپریس کو اس وقت روکا گیا جب ریلوے اہلکار نے ریلوے پٹڑی پر دو مشتبہ افراد کو دیکھا جس کے بعد ٹرین کو روک لیا گیا اور ٹرین کی حفاظت پر مامور پولیس اہلکاروں نے مشتبہ افراد کا پیچھا کیا جس پر ایک مشتبہ شخص فرار جبکہ دوسرے کو گرفتا رکرلیا۔ ریلوے پٹڑی کو کلیئر کرنے کے بعد پندرہ منٹ کی تاخیر سے جعفر ایکسپریس کو روانہ کردیا گیا۔ ایس پی سریاب عبداللہ جان آفرید ی کے مطابق مشتبہ شخص عبدالوہاب ولد عبدالنبی سے پوچھ گچھ کی گئی وہ مخبوط الحواس نکلا ۔ تفتیش میں واقعہ میں تخریب کاری کی کوشش کا کوئی عنصر نظر نہیں آیا۔
