کوئٹہ: کوئٹہ میں نامعلوم افراد نے پرانی دشمنی کی بناء پر فائرنگ کرکے دو بھائیوں کو قتل کردیا۔

پولیس کے مطابق کوئٹہ کے علاقے ارباب کرم خان روڈ پر نامعلوم افراد نے سفید ڈبل ڈور پک اپ گاڑی رجسٹریشن نمبر پی اے جے346 پر فائرنگ کردی جس کے نتیجے میں گاڑی میں سوار ماشکیل سے تعلق رکھنے والے دو سگے بھائی جاں بحق ہوگئے۔

فائرنگ کے بعد ملزمان فرار ہوگئے۔ لاشوں اور زخمی کو سول ہسپتال منتقل کردیا گیا۔ پولیس کے مطابق بائیس سالہ فاروق ولد عبداللہ ریکی کو سر،چھاتی اور بازو میں پانچ گولیاں جبکہ اس کے بھائی بیس سالہ جنید کو بازو اور سینے میں تین گولیاں ماری گئی ہیں۔

قتل کی وجہ پرانی دشمنی بتائی جاتی ہے۔ فائرنگ کے بعد مقتولین کی گاڑی بے قابو ہوگئی جس کی زد میں آکر عائشہ نامی خاتون بھی زخمی ہوگئی جسے ٹراما سینٹر منتقل کردیا گیا ہے۔