پاک افغان سرحد پر دومقامات پر لگے باڑ پر گزشتہ روز دہشت گردوں نے حملہ کیا۔ سکیورٹی فورسز کی جوابی کارروائی میں 10 حملہ آور مارے گئے اور 4 سیکورٹی اہلکار زخمی ہوئے۔ حملے باجوڑ اور بلوچستان کے قمر الدین کاریز کے سرحدی علاقے میں ہوئے۔
نگران وزیراعظم کی حلف برداری کے بعد اب سیاسی جماعتیں عام انتخابات کی تیاریوں میں مصروف ہوگئی ہیں خوشی کی بات یہ ہے کہ ملک کی تمام بڑی سیاسی جماعتیں وقت مقررہ پر عام انتخابات چاہتی ہیں ۔
غیرملکی خبررساں ادارے کے مطابق افغان حکام اور طالبان کے درمیان جنگ بندی کے لیے خفیہ مذاکرات ہوئے ہیں۔افغانستان میں امریکی فوج کے سربراہ جنرل جان نکلسن نے کہا ہے کہ ان مذاکرات میں دوسرے ملکوں کی حکومتیں اور چند بین الاقوامی تنظیمیں بھی شامل ہیں۔رواں برس فروری میں افغان صدر اشرف غنی نے طالبان کو مذاکرات کی پیش کش کی تھی تاہم طالبان نے اس کے جواب میں اس وقت کچھ نہیں کہا تھا۔
بلوچستان اسمبلی میں 25جولائی کو ہونے والے عام انتخابات کو اگست کے آخری ہفتے تک ملتوی کرنے سے متعلق قرار داد منظور کرلی گئی۔ قرارداد کے خلاف اپوزیشن جماعت پشتونخواملی عوامی پارٹی نے احتجاج کیا اورقراردادمنظور ہونے پر ایوان سے واک آؤٹ کیا۔
صوبائی کابینہ کے اجلاس میں صوبے میں طویل خشک سالی اور کم بارشوں کی وجہ سے زیر زمین پانی کی گرتی ہوئی سطح کو روکنے اور خالی ڈیموں کو بھرنے کے لئے صوبائی حکومت اور غیرملکی کمپنی کلائمٹ گلوبل کنٹرول ٹریڈنگ کے ساتھ معاہدہ کی تفصیلات سے آگاہ کیا گیا جس کے تحت کمپنی ابتدائی طور پر آزمائشی بنیادوں پر مکران ڈویژن کے ضلع گوادر میں دس ہزار سکوائر کلومیٹر پر مشتمل علاقہ میں واقع چار ڈیموں کے کیچمنٹ ایریا پر مصنوعی بارش برسائیگی ۔
پاکستان کے نامزد نگران وزیر اعظم جسٹس ریٹائرڈ ناصر الملک پاکستان کی عدالت عظمیٰ سپریم کورٹ کے 22 ویں چیف جسٹس رہ چکے ہیں۔وہ موجودہ حکمران جماعت کے اقتدار میں آنے کے بعد چیف جسٹس بنے تھے اور ایک برس سے زیادہ عرصے تک اس عہدے پر فائز رہے ۔جسٹس ریٹائرڈ ناصر الملک کا تعلق صوبہ خیبر پختونخوا کے علاقے سوات سے ہے جہاں وہ 17 اگست 1950 کوپیدا ہوئے۔
کوئٹہ قلت آب کا شکار ہے۔ شہرکے بیشتر علاقے پانی جیسی بنیادی سہولت سے محروم ہیں۔ شہر میں پانی کی قلت ہمیشہ سے رہی ہے جس کی بڑی وجہ غیر قانونی ٹیوب ویل ہیں جس سے معاملہ زیادہ سنگین ہوگیا ہے ۔ پانی کی قلت کی بہت سی وجوہات ہیں ان میں سب سے بڑی وجہ زیر زمین پانی کی سطح کا تیزی سے گرنا ہے ، روز بروز زیر زمین پانی کا ذخیرہ کم سے کم ہوتا جارہا ہے۔
وزیراعلیٰ بلوچستان میر عبدالقدوس بزنجو کاکہنا ہے کہ مختصر وقت میں عوام کے ساتھ جو وعدے کیے ، وہ تمام وعدے پورے کیے لیکن بعض ایسے مسئلے تھے جو کم وقت کے باعث ہم سے نہیں ہوسکے ۔
قومی اسمبلی نے وفاق کے زیر انتظام قبائلی علاقہ جات کو صوبہ خیبر پختونخوا میں ضم کرنے کی آئینی ترمیم منظور کر لی ہے۔ قومی اسمبلی کے اجلاس میں حکومت کی جانب سے فاٹا کو خیبر پختونخوا میں ضم کرنے کے لیے 31ویں آئینی ترمیمی بل وزیر قانون و انصاف محمود بشیر ورک نے پیش کیا۔
سابق وزیر اعظم میاں محمد نواز شریف نے احتساب عدالت کی طرف سے پوچھے گئے سوالوں کا جواب دیتے ہوئے کہاکہ ان کے خلاف بدعنوانی کے مقدمات سابق فوجی صدر پرویز مشرف کے خلاف غداری کا مقدمہ درج کروانے کی سزا کے طور پر دائر کیے گئے۔