نئی دلی: مقبوضہ کشمیر کے اڑی سیکٹر میں فوجی ہیڈ کوارٹر پر حملے کے بعد اپنی خود ساختہ طاقت کے گمان میں مبتلا بھارتی فوج نے مودی سرکار کو پاکستان کی حدود میں محدود پیمانے پر حملوں کا مشورہ دے دیا ہے۔ مقامی میڈیا کے مطابق گزشتہ روز مقبوضہ کشمیر کے اْڑی سیکٹر میں قائم فوجی ہیڈ کوارٹر پر حملے میں 17 اہلکاروں کی ہلاکت کے بعد کسی تفتیش کے بغیر ہی بھارت سارا الزام پاکستان پر ڈال رہا ہے حالانکہ بھارتی میڈیا کے مطابق انٹیلی جنس اداروں نے اس قسم کے حملے کا خدشہ کئی روز قبل ہی ظاہرکردیا تھا لیکن اس کے باوجود بھارت اپنی غلطی نہ ماننے کی روش اختیار کئے ہوئے ہے اور بھارتی فوج تو اس حد تک آگے بڑھ چکی ہے کہ اس نے مودی سرکار کو پاکستان کی حدود میں محدود پیمانے پر حملوں کی تجویز پر غور کرنے کا بھی کہہ ڈالا ہے۔ دفاعی حکام نے کہا ہے کہ بھارت کی دفاعی حکمت عملی پاکستان کو شہہ دیتی ہے اور اس کا نتیجہ ممبئی حملے اور پٹھان کوٹ ایئربیس پر دہشت گردی کی صورت میں نکلتا ہے۔ اپنی طاقت کے حوالے سے خوش گمانی میں مبتلا بھارتی فوج اڑی حملے کے بعد لائن آف کنٹرول پر کشیدگی میں اضافہ کرنا چاہتی ہے۔ اس سلسلے میں بھارتی فوج اور وزارت دفاع کے اعلیٰ حکام نے مودی سرکار کو تجویز دی ہے کہ لائن آف کنٹرول سے متصل پاکستانی علاقوں اور آزاد کشمیر میں گھس کر محدود پیمانے پر کارروائی کی جائے تاہم بھارتی حکومت کو اس حقیقت کا پوری طرح ادراک ہے کہ اس طرح کی کسی بھی کارروائی کی صورت میں مکمل جنگ شروع ہونے میں وقت نہیں لگے گا۔ مودی سرکار نے لائن آف کنٹرول پر موجود سیکیورٹی فورسز کو مکمل تیار کرنے کا حکم دے دیا ہے ، اس کے علاوہ پاکستان سے متصل سرحدوں کے قریب واقع بھارتی فضائی اڈوں پر تعینات عملے کو بھی الرٹ کردیا ۔ اگرچہ بھارت پاکستان کی فضائی حدود کی خلاف ورزی کرتے ہوئے محدود پیمانے پر کارروائی، خفیہ فوجی آپریشن یا دیگر کارروائیوں کی تجاویز پر عمل نہیں کررہا تاہم ماضی کی طرح لائن آف کنٹرول پر اشتعال پھیلاکر مبینہ طور پر پاکستان کو نقصان پہنچا سکتا ہے۔ اس سلسلے میں بھارتی فوج پاکستان کی حفاظتی چوکیوں اور دیگر تنصیبات پر بھاری گولہ باری کی جاسکتی ہے،آن لائن کے مطابق بھارتی وزیر مملکت برائے امور خارجہ وی کے سنگھ نے کہا ہے کہ اڑی حملے کے بعد وزیراعظم کہتے ہیں کہ کوئی نہ کوئی فیصلہ ضرور ہو گا۔ حکومت کو جذباتی فیصلہ نہیں کرنا چاہیے۔ تحقیقات کے بعد ہی کوئی فیصلہ کرنا چاہیئے۔ بھارتی میڈیا رپورٹ کے مطابق پیر کو میڈیا سے گفتگو کرتے ہوئے بھارتی وزیر مملکت برائے امور خارجہ وی کے سنگھ نے کہا ہے کہ اڑی حملے کے بعد بھارتی حکومت کو اپنے جذبات کو کنٹرول کرنے چاہیءں اور کوئی جذباتی فیصلہ نہیں کرنا چاہیئے۔ بھارتی نیشنل انوسٹی گیشن ایجنسی اُڑی فوجی اڈے پر جا رہی ہے۔ تحقیقات کرے گی۔ حتمی تحقیقات کے بعد ہی کوئی فیصلہ کیا جائے۔ انہوں نے کہا کہ اُڑی حملے کے بعد وزیراعظم نریندر مودی کہتے ہیں کہ کوئی نہ کوئی فیصلہ تو ضرور ہو گا، بھارتی وزیرروی شنکر پرساد نے کہا یہاں تک دعویٰ کردیا کہ اڑی حملو ں میں پاکستان کے ملوث ہونے کے شواہد موجود ہیں۔پیر کو بھارتی میڈیا کے مطابق روی شنکر پرساد نے کہا ہے کہ اڑی حملوں میں پاکستان ملوث ہے اور ہمارے پاس پاکستان کے ملوث ہونے کے شواہد موجود ہیں۔بھارتی وزیر نے کہا کہ ان حملوں کے بعد پاکستان اور بھارت کے تعلقات پہلے کی طرح نہیں رہ سکتے بلکہ مزید خراب ہوسکتے ہیں۔
