اسلام آباد: پاک فوج نے سرجیکل سٹرائیک کا بھارتی دعویٰ مکمل شوائد کے ساتھ مسترد کردیا ہے جبکہ کنٹرول لائن کے قریب آبادی نے بھی بھارتی دعوے کو سفید جھوٹ قرار دیا ہے ۔ ترجمان پاک فوج لفیٹیننٹ جنرل عاصم سلیم باجوہ نے کہا ہے کہ بھارت پاکستان پر حملے کا سوچے بھی نہیں سکتا ایسی کسی بھی غلطی کا منہ توڑ جواب ملے گا۔ ملکی اور غیر ملکی میڈیا کو ہفتہ کے روز کنٹرول لائن کے بھمبر اور تتہ پانی سیکٹر کا دورہ کروایا گیا ان دونوں سیکٹرز پر بھی بھارتی فوج نے سرجیکل سٹرائیک کا دعویٰ کیا تھا تاہم جب میڈیا کی ٹیمیں وہاں پہنچیں تو بھارتی دعوے میں کسی قسم کی کوئی صداقت نظر نہیں آئی ۔ جنرل آفیسر کمانڈر میجر جنرل چراغ حیدر اور بریگیڈئر فرقان معظم نے میڈیا کو بھمبر سیکٹر میں کنٹرول لائن کی موجودہ صورتحال اور پاکستان و بھارت کی چیک پوسٹوں کے بارے میں تفصیلی بریفنگ دی ۔بعدازاں پاکستانی مورچوں کے پاس بریفنگ دیتے ہوئے ڈی جی آئی ایس پی آر لیفٹیننٹ جنرل عاصم سلیم باجوہ نے کہا کہ بھارت سفید جھوٹ بولتا ہے پہلے کہا کہ سرجیکل حملہ ہیلی کاپٹرز کے ذریعے کیا گیا میڈیا خود دیکھ لے کہ یہاں پر کسی بھی ہیلی کاپٹر کے آنے اور جانے کا نشان تک نہیں ہے پھردعویٰ کیا کہ پیرا ٹروپرس اتارے تو بتایا جائے کہ انہیں کس نے دیکھا ؟پھر کہا کہ سپیشل سروسز نے آپریشن کیا اس دعوے میں بھی کوئی حقیقت نہیں ہے یہ کیسا سرجیکل آپریشن تھا جس کا ہماری فوج کو پتہ ہی نہیں چلا اور کسی جگہ اور کوئی نشان تک بھی نہیں۔ انہوں نے کہا کہ پانچ جگہوں پر سرجیکل سٹرائیک کا دعویٰ بے بنیاد اور سفید جھوٹ ہے اقوام متحدہ کا مبصر مشن خود بھی اس کی تحقیقات کررہا ہے بھارت کہتا ہے کہ اس نے ہمارے فوجیوں کو بڑی تعداد میں شہید کیا تو بتائے کہ ان فوجیوں کے جنازے کہاں ہیں ؟ اگر انہوں نے کسی کو پکڑا ہے تو اس کے ثبوت دیں ان کا کہنا تھا کہ پاکستان کی حفاظت کیلئے ہر کوئی جان دینے کو تیار ہے ہمیں اپنے شہداء پر فخر ہے بھارتی فوج کی بلااشتعال فائرنگ سے دو جوان شہید جبکہ 9زخمی ہوئے تھے زخمی ہونے والے 9فوجی صحت یاب ہوکر دوبارہ ڈیوٹی پر آگئے ہیں انہوں نے کہا کہ ہمیں یقین ہے کہ جو موثر جواب ہم نے دیا اس سے بھارت کی بھی ہلاکتیں ہوئی ہیں جنہیں وہ چھپا رہا ہے۔ انہوں نے کہا کہ بھارت خود جنگ بندی معاہدے کی خلاف ورزی کررہا ہے اور سویلین آبادی کے انخلاء سے بے چینی پھیلا رہا ہے ہمارے تمام لوگ مورچوں میں موجود ہیں اور کسی بھی خلاف ورزی کا بھرپور جواب ملے گا ۔ ڈی جی ملٹری آپریشنز کے درمیان ہاٹ لائن پر جو رابطہ ہوا اس پر بھی پاکستان نے بلااشتعال فائرنگ پر اپنا احتجاج ریکارڈ کرایا ہے پاکستان دہشتگردی کیخلاف جنگ لڑ رہا ہے کیونکہ ہم خود دہشتگردی کا شکار ہیں اور کسی قسم کی دراندازی ہماری پالیسی کا حصہ ہی نہیں ہے ہم دہشتگردی کیلئے اپنی سرزمین کسی کو استعمال نہیں کرنے دینگے۔ ایک سوال پر انہوں نے کہا کہ بھارت کی حقیقت پوری دنیا کے سامنے عیاں ہوچکی ہے وہ کشمیریوں کی آزادی کی جدوجہد کی تحریک کو روکنے اور مٹانے میں ناکام رہا ہے اور بوکھلاہٹ میں پاکستان پر الزامات عائد کررہا ہے لیکن پاکستان نے ہمیشہ ذمہ داری کا مظاہرہ کیا ہے اور کنٹرول لائن کی خلاف ورزی کے واقعات کی تحقیقات کا مطالبہ بھی کیا ہے تاکہ حقیقت سامنے آسکے یہ بات واضح ہے کہ جنگ بندی معاہدے کی خلاف ورزی ہمیشہ بھارت کی جانب سے کی گئی مقبوضہ کشمیر میں جو آزادی کی تحریک چل رہی ہے اس کے روح رواں وہاں کی عوام ہیں اور پاکستان ان کی اخلاقی اور سفارتی حمایت جاری رکھے گا بھارت کے مظالم مقبوضہ کشمیر میں جاری ہیں اور کرفیو کو 84دن ہوگئے ہیں اس کے باوجود وہاں کی عوام حق خودارادیت کیلئے جدوجہد کررہے ہیں۔
